Saudi-Arabiami innuttaasoq niaquerlugu toqumut pillagaasimavoq
Taamaalilluni ukioq manna ukiup qaammataani tallimani siullerni inuit 80-it toqumut pillarneqareerput, siorna ukioq tamaat toqumut pillagaasut 87-iusimallutik, Franskit nutaarsiassaqartitsiviat AFP taama nalunaaruteqarpoq.
Toqumut pillagaasoq kingulleq nunamut kunngeqarfiusumut tassunga ikiaroornartumik hashimik anngiortumik eqqusseriarsimanini pillagaassutigaa.
Pinerlunniartartut qunulersinneqarnissaat, Saudi-Arabiami oqartussat toqumut pillaasarnerminni tunngavilersuutigaat.
Naalagaaffiup taassuma toqumut pillaasarnerminik atorunnaarsitsiumannginnera, inuttut pisinnaatitaaffinnut suliniaqatigiiffiit ukiorpassuarni isornartorsiortareerpaat.
Saudi-Arabia 2014-imi nunat pingasut amerlanerpaanik toqumut pillaasimasut akornanniittoq, Amnesty Internationalimit oqaatigineqarpoq.
