Sarulliit pillugit IA aamma ujartuipput
- Aalisagartassat piniakkallu ikiliartortutut nalilerneqartut mianerisarpavut, isumaqarpugulli aalisakkat amerliartortutut nalilikkat pillugit illersorneqarsinnaasoq ukiup qaammataanut kingullermut immikkut pisasseeqqissinnaaneq. Taamaammat Naalakkersuisuugallartut inassuteqarfigerusuppavut piaartumik qaammammut ataatsimut naammattunik saarullittassat illersorneqarsinnaasumik ilaqqullugit, IA-meersut Sara Olsvig aamma Ane Hansen Naalakkersuisunut saaffiginnissumminni allapput.
Taakkua innersuussutigaat Naalakkersuisuutitaqarnermik nalaani ukiup naalernerani pisassat sinneruttut nunguttullu eqqarsaatigalugit ukiup periarfissap qanoq agguataarneqarsimaneri qimerloorlugit iliuuseqartarsimallutik.
Tamatumalu saniatigut inuussutissarsiummut attuumassuteqarsinnaasuni pikkorissartitsinerit immallu naqqanik saliisitsinerit ingerlattarsimagamikkit.
Taamaattumik Naalakkersuisuugallartut ukiup sinneranut naammattunik iliuuseqaqqullugit IA-p kajumissaarpai, Sara Olsvig aamma Ane Hansen allapput.
