Sara Olsvigip suleqatigiittoqarsinnaanissaq ammaffigaa
Partiili Siumutut aqqanilinnik Inatsisartuni ilaaasortaatitaqalissaaq, IA-llu siulittaasuata Sara Olsvigip angusaq tamanna naammagisimaarpaa, isumaqatigiinniarnissamullu piareeqqanerarluni:
- Nukittuumik massakkut inissisimavugut, aamma qinigaatitavut aqqanillit inuupput tamaavimmik sulerusussusillit, aammalu Inatsiartuni ajunnginnerpaamik suleqataajumaartut. Taannalu uanga soorunami nuannaarutigisorujussuuara qujamasussutigalugulu, Inuit Ataqatigiit siulittaasuat Sara Olsvig oqarpoq.
Taanna Inatsisartunut qinersinermi taaguunneqarnerpaavoq, 5825-nit taaguunneqarami. Tamannalu isumaqatigiinniarnissamut pingaaruteqartoq, Sara Olsvigip oqaatigaa:
- Isumaqarpunga massakkut imatut qinersinerup inerneqarnera, tassalu partiit annersanngunngikkaluarluta siulittaasutut uanga qinigaanerpaasimanera taanna aamma pisussaaffiliisoq partiimut annerpaanngorsimasumut. Suleqatigiittoqartariaqarpoq, aammalu inuiaqatigiit atorfissaqartippaat massakkut toqqissisimasumik ingerlaqqinnissaq, Sara olsvig oqarpoq.
Partiinullu kikkunnulluunniit isumaqatigiinniarnissamut ammanertik Inuit Ataqatigiit oqaatigaat, naalakkersuisoqatigiinnulli peqataanissaq aamma piumasaqaateqarfigaat:
- Naalakkersuinikkut akisussaaqataanissamut piareersimalluinnaqqissaarpugut, kisianni aamma erseqqissunik piumasaqaateqassaagut naalakkersuisooqataalissagutta, tassalu naalakkersuilluarnissaq ingerlanneqassasoq, Nunatta aningaasaqarnera patajaatsumik ingerlanneqassasoq, aammalu soorunami Nunatta karsianik atornerluisimanerit taakkua erseqqiivissumik massakkut oqaatigineqassasut tamakkuninnga akuersaanngilluinnaqqissaartugut, Inuit Ataqatigiit siulittaasuat Sara Olsvig oqarpoq.