Saqqarmiut Maryp tikeraarnissaanut piareersarput
Kunngissap nulia Kronprinsesse Mary Saqqamut tikissaaq marlunngorneq juunip tallimaat. Tikeraarnermi malunnartinniarneqarpoq qinngasaarisarneq pillugu suliniut Kammagiitta. Suliniutip 2010-mi aallarnisarnerani Saqqaq misileraavittut ingerlavoq. Maanna meeqqat misilittagarilersimasatik oqaluttuarisussanngorpaat.
Kronprinsesse Maryp assiga Saqqami meeqqerivimmi Pakkutami nivinngarneqarsimavoq. Erinarsuutit oqaluttuassallu maanna sungiusarneqarput Kronprinsessep tikeraarnerani saqqummiunneqartussat, tassanimi meeqqat misilittagaat Maryp tusarnaariarniarpai. Maryp angalaqatigissavai kunngikkormiut illussaarsuanni sulisut, Mary Fondenimeersut, Red Barnetimeersut aamma Lego Fondenimeersut.
- Tikeraartoqarnissaq meeqqat suli oqallisigivallaanngilaat. Kisianni assut qilanaarput kunngikkormiunit tikeraartoqarnissatsinnut, Pakkutami ningiu Dora Jensen KNR-imut oqarpoq.
Meeqqerivimmi tassani Kammagiitta ukiup ingerlanerani anguniagssatut pilersaarummi 2011-miit aalajangersimasumik ilaatinneqarpoq tallimanngornerillu tamaasa Kammagiitta ingerlanneqartarpoq. Tassani sakkussat kuffertimiipput kuffertillu taama ittut Kammagiittamik ingerlatsisunut agguaanneqartarput.
- Ilaatigut atorparput oqaloqatigiinnermut allattarfik qinngasaaruttarneq oqallisigileraangatsigu atortagarput. Aamma rytme atorlugu timi atorlugu sungiusartarpugut. Aamma atuffassinermi tusarnaajutaa meeqqat imminnut tagiartortarput, Dora Jensen oqarpoq.
- Suliniutip iluaqutaanera malugillualereerparput, Pakkutap ningiua oqarpoq.
- Meeqqat imminnut ikioqatigiilluarnerujussuanngorput ammanerulerlutillu. Aamma imminnut ataqqinerulerput isumaqatigiinngittarnerit ikilillutik. Sungiusaatinut ilaavoq qinngasaartittup qanoq misigisarnerata iserfiginissaa aammalu qinngasaarisut misigisarnerat iserfigineqartarluni. Taamaasillutik ilikkariartornerpaat qinngasaaruttarneq ileqqusaanngitsoq, Dora Jensen oqarpoq.
Maanna tassa nunaqarfik taanna Vajgatip sulluaniittoq Marymit tikeraarneqarnissaminut piareersarfiuleruttorpoq. Kronprinsesse malittaalu Ilulissanut tikissapput juunip sisamaat Saqqamullu ingerlaqqissallutik juunip tallimaani. Ilulissanut uteriassapput juunip arfernat tassanilu Atuarfik Jørgen Brønlund Kammagiittamik aamma ingerlatsiffiusoq pulaarneqassaaq.