ARAJUTSIVIGIT? Sapaatip akunnerani nutaarsiassat pingaarnerit

Sapaatip akunnerani qaangiutilersumi pisoqalaavippoq. Nutaamik naalakkersuisoqalernera, perlukut nerukkaatissiarineqartalerneri kiisalu sulisussanik kinamiunik tikisitsisariaqalerneq KNR-imit oqaluttuaraagut.
Assi © : Mittarfeqarfiit
Allattoq Mads Pedersen
apriilip 22-at 2017 09:07

Nunatsinni ikiaroornartup akiorniarnissaanut atatillugu nakkutilliinerunissaq anguniarlugu, Siumumeersoq Karl Kristian Kruse, siunnersuuteqartoq poorskip qaangiunnerani KNR-mi oqaluttuaraarput. Ilaatigut talittarfinni nakkutilliineq pitsaanerunissaa anguniarneqarpoq. 

Danskit ministeriunerata, Lars Løkke Rasmussenip, Nunatta aaqqissuusseqqittariaqarneranik nalunaarusiamik tunngaveqarluni oqariartuuteqarnera marlunngornermi oqaluttuaraarputtaaq.

Kalaallit Nunaat siuariartorpoq, tamannali naammanngitsoq ministeriuneq naqissusiivoq.

Suliffissarsiortut pillugit nuannersumik marlunngornermi nutaarsiassaqarpoq. Suliffissarsiortut ikileriangaatsiarsimasut Nanutta Naatsorsueqqissaartarfiata saqqumiuppaa.

Suliffissarsiortut 8215-it qaammammi ataatsimi amerlanerusuniluunniit suliffissarsiortutut qaammatit aqqaneq-marluk ingerlaneranni nalunaarsoqqasimapput. Ukioq kingulleq nalunaarsuinermut sanilliukkaanni piffissami tassani 8.851-it suliffissarsiortutut nalunaarsoqqasimapput.

Oqaatsit pillugit oqallinneq nutaarsiassat qulequtaanni inuillu nittartakkatigut naapittarfianni sapaatip akunnerata siuliani matumanilu initupput. KNR-imit Jeanette Holm qallunaatut oqaaseqartuugaluarluni kalaaliusoqarsinnaaneranik oqaluttuartipparput.  

Kulusuup mittarfiani nanoq toqunneqannginnermini angalaarsimasoq pingasunngornermi allaaseraarput. Nanoq taanna aallaaneqarluni toqunneqartariaqarsimavoq. 

Pingasunngornermi Namminersorlutik Oqartussat suliffeqarfiutaannit nutaarsiassat nuannersut imaaginnavipput. Siullermik Tele Posti sukkanerusumik akikinnerusumillu internetseqalernissamik neriorsuuteqarluni nalunaaruteqarpoq.  

Aappassaani Royal Greenland aatsaat taamak angusarissaartigaluni nalunaaruteqarpoq. Suliffeqarfillu umiarsuarnut nutaanut marlunnut aningaasaliisimalluni aamma nalunaaruteqarluni.

 

Pingajuattut Neqi A/S-i perlukunik eqqaaginnarani qimminut nerukkaatissanik nioqquteqalernini nalunaarutigaa. Maanna qimmiutillik nerukkaatissanik Nunatsinneersunik pisisinnaanngorput. 

Nutaarsiassat nuannersut tulleriiaatiinnavipput. Misigisassarsiorfissani nuannerunarnerpaani qulini Nunarput siuttutut inissisimasoq KNR-imit oqaluutuaraarput. Japan, Thailand, Nepal, Rusland, Marokko nunallu allat tikeraassallugit nuannerunarnerpaat allattorsimaffianni Nunatta siuttuuffigisaani ilaapput. Tikeraagassat nuannerunartut allattorsimaffiat Rough Guidesimit, angalasarneq pillugu akuakkanik saqqummersitsisartumit, suliarineqarpoq.

Taava nutaarsiassanit nuannersunit nutaarsiassamut utikattumut saassaagut. Siumumi avissaartuunneq tamanit takuneqarsinnaasumi pigaluttuarpoq. Siumup siulittaasuata, Kim Kielsenip, Siumoqatigni Qaasuitsoq kujallermiittut oqaaqissaarpai; affaannarmik Siumuusoqarsinnaanngitsoq.

Qaasuitsorli kujallermi avissaartuunnermi pingaarnertut inuttaasoq, Enok Sandgreen, kommunalbestyrelsimi tamakkiisumik tapersiinini oqaatigerusunngikkaa oqaluttuaraarput. 

Kingusinnerusukku Qaasuitumi Siumut siulittaasuata Sandgreenip partiimit peersitaasariaqannginnera oqariartuutigaa.  

 

 

Siumukkunniiginnarallassaagut. Naalakkersuisut siulittaasuata, Kim Kielsenip, Martha Lund Olsenip taartissaa toqqarsimallugu sisimanngornermi nalunaarutigaa, tassa Erik Jensen, Qeqqata Kommuniani qineqqusaarnikoq, toqqaramiuk.  

Avaqqunneqarsinnaanngitsoq tallimanngormat piviusunngorpoq. Kinamiut 38-t Nunatsinni sulisinnaanissamik akuersissummik tunineqarsimasut Royal greenlandip ilisimatitsissutigaa. Royal Greenlandip kinamiunik tikisitsisariaqalersimanera ataavartumik sulisinnaasunik sulisussaaleqisarneranik aallaaveqartoq, suliffeqarfiup oqariartuutigaa.  

Qujanaq atuaravit. sapaatip akunnera naalluariuk.