Sapaatip-akunnera 18-imi aaqqissuussinerit tapiissuteqarfigineqarput

Meeqqat imigassamik aalakoornartortalimmik atuineq pillugu oqaloqatigineqarnissaat pillugu suliniuteqartoqarpoq "Oqaloqatigiittaritsi"-mik qulequtserlugu, illoqarfinniillu aqqanilinnit nunaqarfinniillu 26-nit qinnuteqaatit Peqqissutsimut naalakkersuisup Doris Jakobsenip sapaatip-akunnerani 18-imi aaqqissuussinernut tapiissuteqarnikkut akuerisimavai:

- Nuannaarutigaa ukioq manna aamma sapaatip-akunnera 18 malunnartinniarlugu annertuumik tapersersorneqarmat neriuutigaaralu oqallinneq uummaarikkumaartoq. Inersimasut akisussaaffiat meeqqallu peqqinnarnerusumik inooriaaseqarnissaannik periarfissinniarlugit tapersersorniarlugillu ukkanniarlugit aalajangersimavugut, Doris Jakobsen oqarpoq, inersimasullu akisussaaffeqarnerat pillugu ima nangilluni:

- Angajoqqaat inersimasullu meeqqat akornanniittut meeqqat inuusuttullu peqqinnerannut aalajangiisooqataasarput. Meeqqagut oqaloqatigigaangatsigit, piffissamik atueqatigigaangatsigit, sunngiffimmilu sulineranni sammisassani tapersersoraangatsigit, inuunermi peqqinnartumi tupatorfiunngitsumi imigassartorfiunngitsumi allanillu aanngajaarniutinik atuiffiunngitsumi tapersersortarpavut, Peqqissutsimut naalakkersuisoq oqarpoq.

Sapaatip-akunnera 18 pillugu annertunerusumik paasisaqarusukkaanni peqqik.gl-imut tamanna alakkarterneqarsinnaavoq.