Sanaartugassanut aningaasaliinerit amerlineqarnissaat Hermann Berthelsenip ujartorpaa

Aatsitassanik misissuinerit annertusarneqartariaqarput, sanaartugassanullu aningaasaliinerit annertusarneqarput, takornariaqartitsinerlu piorsaavigineqartariaqarluni. Qeqqata Kommuniani borgmesterip Hermann Berthelsenip ukiortaami oqalugiaataani tamakku pingaarnertut taakkartorneqarput.
januaarip 11-at 2015 14:55

Aatsitassanik piiaasinnaalernissamut ukiuni kingullerni misissuinerit aallaavigalugit aatsitassanik piiaasinnaalernissaq tulliuttoq, qalluinissamullu akuersissutinik tunniussinissaq aamma tulliuttoq taassuma oqaatigaa:

- Naalakkersuisut kajumissaassavakka suliassat taakku aallartinneqarsinnaanerat sukkanerusumik sukumiisumillu misissoqqullugu, Hermann Berthelsen ilaatigut oqarpoq.

Naalakkersuisunngoqqammersut suleqatigilluarnissaat taassuma aamma neriuutigaara, kommunilu sinnerlugu aamma kissaateqarluni:

- Neriuutigaara Naalakkersuisunngortut suleqatigilluarumaarlugit, naatsorsuutigigakkumi sanaartugassat eqqarsaatigalugit kommunitta ineriartoqqinnissaanut aningaasaliissutit annertunerusariaqartut naleqqunnerpaajussallunilu inoqassuserput aallaavigalugu aningaasaliisoqartaleruni, Hermann Berthelsen oqarpoq.

Inatsisartut sanaartugassanut aningaasaliissutaasa kommuninut nuunneqartalernissaat, taassuma aamma neriuutigaa.

- Naalakkersuisut aamma kajumissaassavakka kommunerujussuanngornermut atatillugu kommuninut nuutassat amerlanerujussuit piaartumik nuunneqarnissaat sulissutigeqqullugu, Qeqqata Kommuniani borgmesteri oqarpoq.

Kommuninut allanut aningaasaliissutissat ilaatigut annertunerunerat, Naalakkersuisoqatigiit isumaqatigiissutaanni takuneqarsinnaasoq Hermann Berthelsenip maluginiarsimavaa, takornariaqartitsinerulli siuarsarniarneqarnera aamma maluginiarsimallugu:

- Siuarsaanissamut aqqutissat ilagivaat Kangerlussuup mittarfissuartut ataannarnisssaanik naqissusiinermi Kangerlussuarmi talittarfeqarnikkut pitsanngorsaanissaq avaqqunneqarsinnaanngimmat, Qeqqata Kommuniani borgmesterip Hermann Berthelsenip, ukiortaami oqalugiarnermini ilaatigut oqaatigaa.