Sam Allardyce nunanut allanut unammisartut sungiusaasuattut soraarsitaasoq

Tuluit Nunaanni isikkamik arsaattartut kattuffissuat sungiusaasussamik allamik ujarlertussanngorpoq. Sam Allardyce qaammatini marluinnarni atorfeqartitaareerluni soraarsitaavoq.
Assi © : commons.wikimedia
Allattoq Ritzau
septembarip 28-at 2016 09:39
Nutserisoq Simon Uldum -

Sam Allardyce tuluit isikkamik arsaallutik unammisartuinut sungiusaasuunermini unammineq ataasiinnaq siuttuuffigivaa.

Sungiusaasoq 61-inik ukiulik, tuluit nutaarsiassaqartitsivii arlallit naapertorlugit, Tuluit Nunaanni isikkamik arsaattartut kattuffiata (FA-p) arsaattartunik nuutsitsinermut malittarisassaanik unioqqutitsinissamut kajumissaarilluni isertortumik videoliarineqarnermi kingorna soraarsitaavoq.

Premier Leaguemi ukiorpassuarni sungiusaasuusimasup Tuluit Nunaata isikkamik arsaannermi nunanut unammisartuisa sungiusaasuattut Roy Hodgson juulip qaammataani taarserpaa.

Kanngunartuliornera tusagassiorfiup Daily Telegraphip saqqummiuppaa, tamatumalu kingorna sungiusaasoq soraarsitaavoq.

Aviisip nittartakkamini isertortumik videoliani saqqummiuppaa, tassanilu Allardycep tusagassiortunik, niuernermik suliaqartuusaartunik, ataatsimeeqateqarpoq.

Videomi Allardycep unammisartup allamit pigineqaqqusaannginnerinik FA-p malittarisassiuussaata qanoq saneqqutaarneqarsinnaaneranik angutit ataatsimeeqatigisani ilitsersorpai.

Malittarisassaq pineqartoq FA-mit 2008-mi atuutilersinneqarpoq, aningaasaatilissuit unammisartumik pisisinnarlutik klubbinut atukkiussisinnaanerat unitsinniarlugu.

Daily Telegraph naapertorlugu "aningaasaatilissuit" ikiornissaannut 400.000 pundinik (3,4 millionit koruunit missaannik) akilerneqarnissani akuerisimavaa.

Videomi aggustimi immiunneqartumi sungiusaasoq maanna soraarsitaasoq naleqqutinngitsunik arlaleriarluni oqaaseqarpoq.

Aamma sulisitsisuni FA isornartorsiorpaa aningaasanik eqqarsarpallaarnerarlugu, arsaattarfissuullu Wembleyp allanngortiternissaanik aalajangerneq "sianiitsuliornertut" aamma taavaa.

Sungiusaatutut taarsikkani Roy Hodgson taassumalu ikiortaa Gary Neville videomi aamma isornartorsiorpai.

/ritzau/