Savalimmiut: Sakkutuut sungiusarnerat oqartussanit tupaallaatigineqartoq
Ukioq manna juunip ulluisa 30-at savalimmiormiut aalisariutaanni inuttanut ulluuvoq allaanerusoq. Aalisariut pineqartoq Savalimmiut kitaatungaanni Islandip imartaata killeqarfiata eqqannguani aalisarpoq. Savalimmiut naalakkersuisuisa ataanni Nunanut allanut Inuussutissarsiornermullu naalakkersuisoqarfik KNR-imut taama ilisimatitsivoq.
Aalisariut aalisaleruttorluni nunat allamiut sorsuutaannit NATO-meersumit radiukkut attaveqarfigineqarpoq. Sakkutuut sungiusarnerat ingerlanneqartoq, aqerlulimmillu igittoqartassasoq ilisimatitsissutigineqarpoq.
Umiarsuup sorsuutip savalimmiormiut aalisartut peqquai ikinnerpaamik sømilinik tallimanik illuaqqullugit. Savalimmiormiut aalisariutaat allat arlallit piffissami tassani aamma sungiusarfiusumiittut, Savalimmiuni naalakkersuisut ilisimatitsissutigaat.
Sungiusartoqarnissaa ilisimatitsissutigineqanngitsoq
Pisoq Savalimmiuni uissuummisitsivoq. Naalakkersuisummi Savalimmiunilu aalisarnermik nakkutilliisoqarfik Vørn sakkutuut sungiusarnissaannik nalunaarfigineqarsimanngillat.
Savalimmiuni illersornissamut suliassaqarfik nunatsinnitulli Danmarkimit oqartussaaffigineqarpoq. Nunanulli allanut inuussutissarsiornermullu ministereqarfik Tórshavnmiittoq naapertorlugu danskit oqartussaasui arlaalluunniit sakkutuut sungiusarnissaannik siumoortumik ilisimatinneqarsimanngillat.
AAMMA ATUARUK Issittumi alapernaarsuutini ilinniarsimasut amigaataasut
Tamannalu Savalimmiuni nunanut allanut inuussutissarsiornermullu ministerimit, Poul Michelsenimit, isornartorsiorneqarpoq.
- Danmarkip sakkutooqarnikkut iligisaata sakkutuuisa Savalimmiut imartaanni sungiusarnissaannik Savalimmiuni naalakkersuisut ilisimatinneqarsimannginnerat assuarnarpoq. Danskit naalakkersuisuisa illersornissamut politikkimut Savalimmiunut tunngassuteqartutigut peqataatitsinerunissamik ilisimatitsisarnissamillu neriorsuuteqarnerannut naapertuutinngilaq, KNR-imut mailikkut taama allappoq.
Issittumi Sakkutooqarfik aamma ilisimasaqanngilaq
Danskilli illersornissamut qullersaqarfiata, Issittumilu Sakkutooqarfiup, pisoq aamma ilisimasaqarfiginngilaat.
- 2018-imi juunip 30-ani pisunut tunngatillugu oqaatigineqassaaq Illersornissamut qullersaqarfik, tamatumanilu aamma Issittumi Sakkutooqarfik, pisunut peqataasimanngimmata taakkulu pillugit aamma ilisimatinneqarsimanngimmata, Illersornissamut ministereqarfik KNR-imut taama ilisimatitsivoq.
AAMMA ATUARUK Savalimmiormiut nunanut allanut ministeriata Danmark tupaallaatigigaa
Illersornissamullu qullersaqarfik pisoq pillugu paasissutissanik pissarsiniarsarisussanngorpoq, Issittumilu Sakkutooqarfiup nunat allamiut sakkutuuisa Illersornissamut qulleqarfiup suliaqarfiini ingerlataat pillugit ilisimatinneqartarnissaa sulissutigineqarluni.
Danskilli illersornissamut ministereqarfiata ilisimatitsissutigaa Naalagaaffeqatigiit - taamatullu aamma Savalimmiut - juunip 30-ani namminersortuunerat innarlerneqanngitsoq. Aalisariutit 200-sømilinik killeqarfiup iluaniinnerat tamatumunnga pissutaavoq, nunat allamiullu sakkutuuisa suliaat tassani inerteqqutigineqaratik.
200-sømilinilli killeqarfiup iluani imaani pisuussutinik atuisinnaatitaaneq tamatumani sianiginiarneqartussaasoq, Illersornissamut ministereqarfik erseqqissaavoq.
Savalimmiuni nunanut allanut inuussutissarsiornermullu ministerip Poul Michelsenip danskit illersornissamut ministeriata Claus Hjort Frederiksenip (V) tallimanngorpat ataatsimeeqatiginerani pisoq saqqummiunniarpaa.
