Sakkutuut Nuugaatsiami pigisanik aallertut
Pigisanik aallertut immikkoortut sisamaasut illunik piginnittut, aallernissamut akuersissuteqarsimasut, pigisaannik aallerput.
Taakkuali aallernissaat sioqqullugu nunaqarfiup isumannaatsuunera qulakkeerneqaqqaartariaqarsimavoq.
Soorlu nunaqarfimmi kallerup inneranut aqqutit kittorarsimasut ulorianarnersut misissoqqaarneqarput, tunitsiviup tankia ammoniakimik imalik ulorianarnersoq misissorneqarluni avatangiiserlu peqqissutsimut ulorianaateqarnersoq misissorneqarluni.
AAMMA ATUARUK Issittumi Sakkutooqarfik pigisanik ullumi aallerniartoq
Nunami sillimaniarnerup saniatigut sakkutuut umiarsuaata, Vædderenip, tamaani tassaarsuaqaqqissinnaanera nakkutigaa.
Pigisanilli aallerneq qanoq sivisutigissanersoq, Issittumi Sakkutooqarfiup oqaatigisinnaanngilaa.
Illut isumannaatsuunerannik alakkaasussanut ilaapput Danmarkimi upalungaarsimasuutitani immikkut ilisimasallit kommunimilu upalungaarsimasut.
Taakkua illut iserfigissallugit qularnaannersut misissussavaat.
Nuugaatsiami pigisanik aallertoqareerpat, Illorsuarni aallertoqassasoq, Issittumi Sakkutooqarfik KNR-imut oqarpoq.
