Illersornissamut qullersaqarfik: Sakkutuujusussaatitaasut amerlanerusut brigadelu nutaaq

Danskit naalakkersuisuisa Illersornissamut qullersaqarfimmut 2023-p tungaanut pilersaarutiminni nutaami suliniutissatut siunnersuutigisaasa taakku ilagaat, danskit tusagassiorfii arlallit taama allaaserisaqarput.

Pilersaarut Christiansborgimi ullumi pingasunngornermi nunatta nalunaaqutaa malillugu ullaap tungaani saqqummiunneqassaaq.

Danskit naalakkersuisui brigademik nutaamik inuussutissarsiutigalugu sakkutuunik inuttaqartumik pilersitserusupput, taakkulu ilaatigut Baltikumimut aallartinneqarsinnaassapput.

Brigade NATO-p kissaateqarneratigut pilersinneqassaaq, Danmarkilu taamaaliortoqarneratigut sakkutuunik 500-t 700-llu akornanni atorfinitsitsisariaqassalluni, TV2 taama allaaserisaqarpoq.

AAMMA ATUARUK Illersornissaq pillugu pilersaarut danskit naalakkersuisuisa saqqummiutileraat

Tamatuma saniatigut Livgardip iluani piareersimasuutitanik nutaanik pilersitsisoqassaaq, sakkutuullu ikinnerpaamik 80-it Danmarkimi peqqarniisaarniartoqassagaluarpat akiuuteriaannaassapput. Taamaaliortoqarneratigullu Livgardimi inunnik 160-inik atorfinitsitsisoqassaaq.

Kingullertullu, minnerunngitsumillu, inuusuttut sakkutuujusussaatitaallutik aggersarneqartussat 500-inik ilaneqassapput. Illersornissamut qullersaqarfimmi nammineq kajumissutsiminnik sakkujuusussaatitaasut ullumikkut 4.200-pput aammalu utaqqisuniittoqarluni.

Danskit naalakkersuisuisa aamma nalunaarutigaat illersornissamut qullersaqarfiup missingersuutai aningaasanik milliardinik ilaneqassasut.

AAMMA ATUARUK Illersornissamut qullersaqarfik Issittumi sipaarniuteqassasoq

AAMMA ATUARUK Aaja: Illersornissaqarfik aningaasanik amerlanernik pisariaqartitsivoq