Sakkutuujusussaanerup Nunatsinnut atuutsinneqarnissaa itigartitsissutigigaat

Siunnersuutip Folketingimi marlunngormat oqaluuserineqarnerani tamanna erserpoq.

Dansk Folkeparti isumaqarpoq sakkutuujusussaaneq kalaallinut savalimmiormiunullu atuuttussanngortinneqarpat tamanna Naalagaaffeqatigiinni nunat akornanni naligiissitsinermik pilersitsissasoq.

Illersornissamullu ministerip Claus Hjort Frederiksenip tamanna itigartilluinnarpaa.

- Savalimmiuni Kalaallit Nunaannilu naalakkersuisut sakkutuujusussaanerup eqqunneqarnissaa kissaatiginngilaat. Danskit naalakkersuisuisa tamanna ataqqivaat. Pissutissaqarsorinngilarput, maannalu pisariaqartutut aamma isiginatigu.

Folketingimili oqallinnermi aamma paasinarsivoq sakkutuujusussaanerup Kunngeqarfimmi tamarmi tunngaviatigut atuutsinneqarnissaa Socialdemokraatit Liberal Alliancellu taperseraat.

Sakkutuujusussaanerulli Nunatsinnit Savalimmiuniillu taperserneqarani kunngeqarfiup sinnerani eqqunneqarnissaa partiit kissaatiginngilaat.

AAMMA ATUARUK Sakkutuujusussaaneq kalaallinut savalimmiormiunullu atuutsikkusukkaat

Partiip Alternativetip sakkutuujusussaaneq nalinginnaasumik akerleraa. Innuttaasut immikkut pisussaaffilerneqarnissaat partiip kissaatigineruaa, taannalu angutinut arnallu, ajornanngippallu Naalagaaffeqatigiinni nunani tamani atuutsikkusullugu. Innuttaasut inuiaqatigiinni qaammatini aalajangersimasuni sulisinneqartarnissaat partiip kissaatigaa, assersuutigalugu isumaginninnerup iluani.

 

Dansk Folkepartiip siunnersuutaa ilaasortanit atlantikup avannaaneersunit sisamaasunit itigartitsissutigineqarpoq.