Sakkut pillugit inatsit Naalakkersuisut sukaterniaraat

Demokratineersup Justus Hansinip paragraf 37 atorlugu apeqquteqaataanut akissuteqarluni Inatsisinik atuutsitsinermut naalakkersuisoq, Martha Lund Olsen, taama ilisimatitsivoq.

Ajunaartoqaqqunagu malittarisassiortoqassaaq

Martha Lund Olsenip akissummini erseqqissarpaa, sakkut pillugit inatsisip sukaterneqarnissaa pisariaqarnersoq naalakkersuisut misissorniaraat. Tassami sakkunik atueriaaserput paarseriaaserpullu pissutigalugit ullumikkut ajunaartoqartarpoq.

- Tamakkulu innuttaasut inuunerannik ulorianartorsiortitsisuupput, naalakkersuisoq allappoq.

Aamma atuaruk Aallaasit nalunaarsorneqartalissasut Demokraatit kissaatigaat

Aamma atuaruk Aallaasit parnaaqqasumiitinnissaat oqallisigineqartariaqarpoq

Justus Hansen Tasiilami nukappiaqqap qulingiluanik ukiullip inuuneranik naleqartumik upernaaq aallartoornerup malitsigisaanik apeqquteqarpoq.

Naalakkersuisut Justus Hansenilu isumaqarput, sakkut pillugit inatsimmi piniartarneq ataqqineqartariaqartut, aammali inuit isumannaatsuunissaat pingaartuusariaqartoq.

Ukiunik minnerpaaffiliineq, nalunaarsuineq inissiisarnerlu

Naalakkersuisulli ajunaarnissaq pinaveersimatinniarlugu qanoq-iliorsinnaanerlutik maanna misissornialerpaat, tamatumunnga aallaasinik nalunaarsuisarnissaq aallaasinillu qanoq inissiisarnissaq ilanngullugu, soorluttaaq aallaasinik pisiniartut ukiuisa minnerpaaffilerneqarsinnaanerat aamma eqqarsaatinut ilaassasoq.

Aamma atuaruk Politi: Nukappiaraq aallartoorfigitinnermi kingorna toquvoq

Taava aamma inatsisiliorneq naammanngitsoq aallaaseqartarnerli inuiaqatigiinni oqallisigineqartariaqartoq Naalakkersuisut erseqqissarpaat.

- Tamatta toqqissisimanernerusumik inuusinnaaqqulluta inuiaqatigiit tamarmik iliuuserisartakkaminnik allannguinissaat aalajangiisuulluinnarpoq, Martha Lund Olsen akissummini allappoq.

Aamma atuaruk Aallartoortoqarnera alianartumik kinguneqarpoq