Gazami sorsunneq: Sakkuaakkunnaarallarnissamik Egyptenimi suli isumaqatiinniartoqartoq
Gazami sakkuaakkunnaarallartoqarnissaanik siunnersuut Hamasikkut akueraat, Israelimili naalakkersuisuinit akueriumaneqarnani. Israelilli sinniisui tamanna pillugu Egyptenimi isumaqatigiinniarnerni suli najuupput.
Gazami sakkuaakkunnaarallartoqarnissaanik siunnersuut Hamasikkut akuerigaat ippassaq ataasinngornermi unnukkut tusarliutigineqareersorlu, palæstiinamiut Gazami illoqarfiit ilaanni Deir el-Balahmi nuannapput.
Allattoq Helle Nørrelund Sørensen
maajip 07-at 2024 08:53
Nutserisoq Mads Lynge
Gazami sakkuaakkunnaarallartoqarnissaa pillugu siunnersuut Hamasikkut akuerigaat, nutaarsiassaqartitsiviup Al Jazeerap ippassaq ataasinngornermi allaaseraa.
Siunnersuulli Israelimi naalakkersuisunit akueriumaneqanngilaq, Israelillu Gazami illoqarfiit inuttunersaanni Rafahmi sakkuaannini nangiinnarlugit.
Sakkuaannerit ulluni 42-ni unitsinneqarallarnissaat Israelillu sakkutuujutini najugaqarfinnit tamanit angerlartissagai ilaatigut siunnersuutigineqartoq, Al Jazeerap allaaseraa.
Naallu Israelip sakkuaakkunnaarallarnissamik siunnersuummik akuersinngikkaluartoq, Israelip sinniisui Egyptenip illoqarfiisa pingaarnersaanni Cairomi isumaqatigiinniarnerni suli najuuttut, nutaarsiassaqartitsivik DR allappoq.
