Saarullittassat ilaneqarput

Sinerissap qanittuani saarullittassat 2.000 tonsinik ilaneqassasut Naalakkersuisuugallartut, partiit siulittaasuinit tapersersorneqarlutik, akuersissutigaat.
novembarip 26-at 2014 16:56

Kitaani sinerissap qanittuani saarullinniarnissamut pisassiissutit, novembarip 19-iani tamakkerlugit aalisarneqarsimasut, ilaneqarnissaat KNAPK-p kissaatigisimavaa, saarullittassat 2.000 tonsinik ilaneqarnissaannik qinnuteqaat Naalakkersuisut akueraat.

Aamma atuaruk Atassut saarullittassiissutit amerlineqarnissaannik piumasaqartoq

Pinngortitaleriffiup saarullittassat ilaneqannginnissaanik oqariartuuteqarnikuugaluartut, Naalakkersuisut inuiaqatigiinnut iluaqutaanissaa pinerullugu akuersipput.

Aamma atuaruk Sarulliit pillugit IA aamma ujartuipput

- Sinerissap qanittuani saarullinnik aalisarnerup unitsinneqarnerani  aalisarunnaarnerullu kingunerisaanik artornartorsiorfiusumi, aalisartunut kisimi attuisuunngitsumi aammali tunisassiorfinni sulisorisanut inuiaqatigiillu ataatsimut isigalugit, Aalisarnermut Naalakkersuisoqarfik allappoq.

Aamma atuaruk Saarullittassiisoqaqqinnissaa aalisartunit piumaneqarpoq

Uumassusilerisut 2014-imut saarullittassat 12.000 tonsiunissaat siunnersuutigisimavaat. Oktobarip qaammataani nungullutik aalisarneqarmata, ilallugit 4.500 tonsinik saarullittassiisoqarpoq, 2014-imi katillugit saarullitassat 16.500 tonsinngorlutik. Maannalu 2.000 tonsinik ilaneqarmata 2014-imi saarullittassat 18.500 tonsiulerput.