VIDEO Saammaateqatigiinnissamut isumalioqatigiissitaq misissuisoqarnissaanik ujartuisoq
- Utoqqatserfigineqarneq eqqugaasimasunut isumaqassaqisoq siullermik oqaatigerusuppara.
- Peqatigiiffiit akisussaassuseqartut immaqali aamma pisortat eqqugaasunut utoqqatsissappata ajunngilluinnarpoq, Jens Heinrich KNR-mut oqarpoq.
Danskit naalagaaffiat peqatigiiffiillu marluk, Red Barnet aamma Røde Kors, suleqatigiillutik kalaallit meerartaasa ilaat 22-t tallimanit arfineq-pingasunut ukiullit ilaqutaannit avissaartillugit Danmarkimut aallartippaat, ukioq ataaseq affarlu aallaqqasussanngorlugit. Tassani Kalaallit Nunaata Danmarkisut ineriartortinneqarnissaa siunertaralugu kalaallit danskinngorsagaanissaat anguniarneqarpoq.
Aamma atuaruk Red Barnet Eksperimentimut peqataasimaneq utoqqatsissutigaat
Meeqqalli nunatsinnut 1952-imi uteramik kalaallisut oqaatsitik kultoorertillu puigorsimavaat, aammalu ilaquttaminnut uteratik Nuummi meeqqanut angerlarsimaffimmut inissinneqarlutik.
Tine Bryldip filmiliaa naammanngilaq
Saammaateqatigiinnissamut isumalioqatigiissitap ilaasortai, oqaluttuarisaanermik ilisimatooq Jens Heinrich aamma Ida Mathiassen, isumaqarput eqqugaasut utoqqatserfigineqarnerat pitsaasuusoq. Kisianni meeqqat sooq aallartinneqarsimanerisa paasinissaa siunertaralugu misissuisoqarnissaa kissaatigaat.
- Meeqqat Danmarkimut aallartinneqarsimanerat pisortanit suli misissorneqarsimanngilaq.
- Tine Bryld pisimasumik qulaajaasumik atuakkiorsimavoq, filmiliortoqarsimallunilu. Kisianni iternga tikillugu misissorneqarsimanngisaannarpoq.
- Susoqarsimava, suna eqqarsaatigalugu taamaaliortoqarsimava, tamakkua mississoqqissaarneqartariaqarput, Jens Heinrich oqarpoq.
Nunatsinni Danmarkimilu oqartussat suleqatigiillutik misissuisariaqartut, taanna isumaqarpoq.
- Nunatsinni Danmarkimilu oqartussat suleqatigiikutsoorsinnaagaluarput.
- Assersuutigalugu Namminersorlutik Oqartussat danskillu naalakkersuisui isumaqatigiillutik pisimasumik, ullutsinni suli artorsaatigineqartumik, misissuititsisinnaagaluarput, Jens Heinrich oqarpoq.
Aamma atuaruk Meeraallutik misileraatitut atorneqartut saammaateqatigiittoqannginnerani utoqqatserfigineqaqqaarusuttut
Red Barnetip "Eksperimentet"-imut peqataanera, 2010-mi taamanikkut qullersap Mimi Jakobsenip Danmarkimi Radioaviisikkut utoqqatsissutigaa. Meeraallutilli aallartitaasimasut utoqqatsertoqarsimaneranik ilisimatinneqanngillat, taamaammat nutaamik toqqaannartumillu utoqqatsertoqarnissaa maanna siunniunneqarpoq.
Red Barnetip, suliaq pillugu nalunaarummik nittartakkamini saqqummiussaqarnissaa pilersaarutaasoq, suliniaqatigiiffiup ilisimatitsissutigaa.
Aamma atuaruk Saammaateqatigiinnissamut Isumalioqatigiissitaq avannaani paasititsiniaalersoq
Danskit Røde Korsiat 2010-mi peqataasimanerminut aamma utoqqatsersimavoq, "meeqqalli" ilaasimasut naapissimanngilaat Red Barnet paasititsivoq.
Danskit naalagaaffiat pisortatigoortumik utoqqatsersimanngilaq.
Oktobarip 22-ani "Utoqqatserfigineqarnissap utaqqinera" KNR-ikkut isiginnaarsinnaavat. Taanna meeqqat 1951-mi Danmarkimut aallartinneqarsimasut, Kristine Heinesen aamma Carla Lucia Knakkergaard, misigisaannik piviusulersaarutaavoq.
