Folketingimut qinersineq 2015 Saamerliit talerperliillu naligiittuarsinnarput
Nutaarsiassaqartitsivik Ritzaus Bureau sinnerlugu Voxmeterip isumasiuinerata takutippaa Thorning saamerliillu qinersinermi 51,9 procentinik pissarsissasut, Løkkelu talerperliillu 48,2 procentinik pissarsissallutik. Atlantikup avannaamiut ilaasortaatitaassaat tamatumani ilaatinneqanngillat.
Partiit siulittaasui ippassaq sapaammi unnukkut qineqqusaarnerup aallartinneqarneraniilli tv-kkut toqqaannartumik aappassaanik akioriissinneqarput. Politikkikkullu alaatsinaattut arlallit naligiittupilussuartut nalilerpaat, Lars Løkke Rasmussenili tv-kkut akioriissitsinerup siulianut naleqqiullugu pitsaanerulaartutut nalilerneqarluni.
Qinersinissap suaarutigineqarneraniilli saamerliit isumasiuinerni tupaallatsitsisarput. Qinigaaffimmimi kingullermi ukiuni sisamangajanni, minnerunngitsumillu upernaaq manna, Thorning saamerliillu isumasiuinerni kinguaqqajuaraluarput.
Ullormi qinersinerup suaarutigineqarfiani, talerperliit 52,6 procentinit taaguunneqartussatut, saamerliillu 47,4 procentinit taaguunneqartussatut inissisimapput.
Qinersinerup suaarutigineqarneranit isumasiuinerni kinguariarnerpaasut tassaapput Dansk Folkeparti aamma Liberal Alliance, taakku procentpointinik marlunnik kinguariarput. Socialdemokraatit partiilu Alternativet siullerpaamik Folketingimut qinigassanngortitsisoq isumasiuinerni siuariartuupput.
