S-mit qinigassanngortittoq nioqqutissanik eqqussuinermut: Pisisartut aamma akisussaaffeqarput

Kalaallit Nunaat Islandimik Canadamillu qaninnerusumik niueqateqarnissaanik politikkikkut oqallittarneq nutaajunngilaq. Nunatsinni pisiniarfissuit nunat sanilerisat nioqqutissiaataannik tikisitsisarlutik ukiuni arlaqartuni misilittaasarput iluatsivissanatillu. Maanna piffissanngorpoq pisisartut nunat sanilerisat nioqqutissiaataannik nutaanik alapernaasernissat pisinissaminnillu paasiniaanissaat, Siumut sinnerlugu inatsisartunut qinigassanngortittoq Vivian Motzfeldt oqarpoq.
novembarip 21-at 2014 18:09

Vivian Motzfeldtip Qaqortumi niuertarfiit pisiniarfigisinnasai maluinnaapput, Brugsen aamma Pisiffik, nioqqutissanik Danmarkimiit annermik tikisitsisartut.

Pisiffik Brugsenilu ingammik Nuummi naatitanik pujuukkanillu timmisartukkut tikisitsisarput, kiisalu mamakujuttunik skyr-imillu Islandimit tikisitsisoqartarluni.

Pisisartulli nunanit allanit pisinissaminnut soqutiginnippallaanngitsut, Vivian Motzfeldtip isumaqarpoq.

- Apeqqutaaginnarpoq piumassuseqarneq, akikinnerusunillu aamma ujarlersinnaaneq. Imaanngitsoq uani niuerneq tamaat mattullugu, kisianni aamma periarfissanik allanik aamma ujartuisinnaanerput uani pineqarpoq, Vivian Motzfeldt oqarpoq.

Nunatsinni pisiassat tamakkerlutik Danmarkimi nioqqutissiarineqarneq ajoraluartut amerlanerusut Danmark aqqutigalugu nunatsinnut eqqussorneqarput, tamakkualu nunani allaneersunit akisunerujussuusartut qinigassanngortittup tikkuarpaa.

 

Canadamit pisiassarpassuit
Pisiniarfiit arlaqartut nunanit allanit tikisitsisareersimapput.

Pilersuisoq aallaasit imassaannik Canadamit tikisitsisarsimavoq, niuertarfiit Superbyg aamma Stark Canadamit nioqqutissanik arlalinik tuniniaasimapput.

Nuummi arlalinnik niuertarfiuteqartumi Kamimmi pisortaq Erik Brogaard oqarpoq, pisisartut nunanit allaneersunit piserusuttartut. Kaaginik Canadameersunik tunisaqarluartarluni oqaluttuarpoq.  

- Kalaallit pisiassanik allanik piserusuttorujussupput. Kisianni containeri ulikkaartoq taamaallaat pisiarineqarsinnaavoq pallettikkaaginaarlugit pisisoqarsinnaanani. Taava pisiat USA-liaanneqaqqaartarput, tassanngaaniit Islandinikkoorullugit aatsaat Kalaallit Nunaannut apuunneqartarlutik. Taamanna umiarsualivimmut akitsuutitigit akisuvoq, taamaattumillu pisiassanik amerlasuukkaarinissaq pisariaqarluni, Erik Brogaard oqarpoq.

 

Piumasaqaateqarpoq
Pisiassat suunerinik allattorsimaffiit pisisartunit paasineqarsinnaanerinik piumasaqaateqarnera, taassuma aamma eqqaasitsissutigaa. Taakkua nunani allamiusut allassimappata, niuertarfiutillit nutsertussaavaat, nutsernerilu pisiassanut ikkussuullugit, piffissartornartumik.

 - Taassuma saniatigut allamik ajornartorsiuteqarpugut. Kalaallit nioqqutissiaataannik nunanut allanut tunisaqarpiarneq ajorpugut, assartuinermullu tamanna akitsorsaataavoq.

Royal Arctic Linemmi containerit imaqanngitsut aningaasarsiutigerpianngilai.

Kisianni tassa akornutassinaasut arlaqaraluartut, kalaallit nunaanni pisisartut nunani Danmarkip avataaniittunit pisisinaapput. Nunaniliallani nioqqutissianik pisiortornerulernissaq eqqarsaatigalugu, politikerit malittarisassanik assartuinikkukkuunniit aaqqissuussinernik allannguissanngitsut, pisisartulliukua ileqqui allannginnartariaqartut, Vivian Motzfeldt oqarpoq:

- Tamatigut isigineqartariaqanngitsut tassaasussaasut politikerit qulaaninngaaniit aalajangiisussat, kisianni uagut innuttatut ilisimanerulertariaqarigut nioqqutissat atorneqarnerinut isummersorsinnaaneq nammineq akuuffigissagipput. Tassanngaanniillu aatsaat qummut politikerit aalajangiisinnaanerat aatsaat killissallugu. Tassa innuttaasut isummersorneraninngaanniit politikerit aalajangernerat taanna kingullinngortillugu. Siumut sinnerlugu inatsisartunut qinigassanngortitoq, Vivian Motzfeldt, Qaqortumiit KNR-imut taama oqarpoq.