Kommune Kujallermi sanaartugassat unittooqqasut

- Taama inissinnerput ilungersunartutut isigaarput, Kommune Kujallermut teknikkimut ataatsimiititaliami ilaasortaq Mouritz Karlsen oqarpoq.

Qaqortumi meeqqeriviit ilaat Angajo oqummat isateriarlugu nutaamik meeqqeriviliornissaq 10,4 millionit koruuniinik aningaasaliiffigineqareeraluartoq suli sanaartorneqalinngilaq.

- Neriussimagaluarpugut ukioq manna aallartittumik suliassat ingerlanneqalissasut. Aningaasammi illuartinneqarnikuusut atorneqartariaqaraluarmata.

Mouritz Karlsen aamma Qassiarsuup Igalikup Narsarsuullu nunaqarfiup aqutsisuini siulittaasuugami nunaqarfinni sanaartugassat kinguartinneqartarnerat naliginnaaleraluttuinnarnerarpaa.

- Nunaqarfinni sanaartugassat eqqarsaatigalugit kinguartitsisarnerit nalinginnaajartuinnaramik, oqarpoq.

Qassiarsummi atuarfik oqummat isateriarlugu nutaamik sananissaq ukioq maannamut 4 millionit koruuninik aamma aningaasaliiffigineqareeraluarpoq. Suliarli suli aamma aallartissinnaasimanngilaq.

-  Oqoqarpallaaqimmat matuneqarnikuuvoq. Kiisami periarfissanimmat aamma ingutserinissaq kinguaqattaarami ilungersunarpoq suliniartuulluni. Taavalu kollegia aamma oqukkami illoq kommunip illuutigisaa kollegiatut atorneqarallarpoq, Mouritz Karlsen oqarpoq.

Suliarinnittussaaleqisut

Kommune kujalleq sanaartortitsiniarluni suliariumannittussarsiuussigaangat ilaatigut neqeroortoqartarsimanngilaq, neqeroorutaasulluunniit kommunip aningaasaliissutaaniit akisunerusarsimallutik.

Tamannalu sanaartugassat aningaasaliiffigineqareeraluartut kinguartinneqartariaqarnerannik kinguneqartartoq, kommunemi teknikkimut ataatsimiitsitaliami siulittaasoq oqarpoq.

- Aamma nalaataqartarpugut neqeroortitsigaluarluta neqeroortoqassanani. Taamaalilluni tamanna ima paasisinnaasarparput sulisinnaasut sulianik ingerlatsisinnaasut ulapinnertik pissutigalugu suliatik killilersimaaraat, Josef Petersen oqarpoq.

Sanaartugassanilli kinguartitsisaqattaartoqarunnaassasoq Kommune Kujallermi illuatungiliuttut aamma neriuutigaat.

- Piaartumik aaqqiissuteqartoqarnissaa ilungersuutigalugu suliaq ingerlapparput, Mouritz Karlsen oqarpoq.

Kommune Kujallermi ukioq maannamut sanaartugassanut aningaaliissutaasut ilaat tassalu 10 millionit koruunit aappaagumut nuutsinneqareersimapput.