Russit killilersuinerat Savalimmiut iluanaarutaalluartoq

Aalisakkanullu akigitinneqartut qaffakkiartuinnartillugit unammillertigisallu ikiliartuinnartillugit Savalimmiut nunanut allanut niuernerminni aatsaat taama angusarissaartigisinnaapput, aviisi Berlingske Business taama allaaserisaqarpoq.

Savalimmiut aalisakkanik nioqqutigisaannik Rusland maanna pisiortornerpaavoq, ilaatigut kapisilinnik, ammassassuarnik avaleraasartuunillu nutaanik.

Savalimmiuni naatsorsueqqissaartarfiup kisitsisaatai nutaat naapertorlugit taamatut avammut nioqquteqarneq 700 millionit koruunit sinnerlugit iluanaarutigineqarsimavoq.

Ruslandip nunat killilersukkami allattorsimaffiannut Island aggustip 13-iani ilanngutitippaa, russillu taamaaliornerisigut Europami unammillertigineqartoq kingulleq aamma niueqatigineqarunnaarpoq.

Ruslandimilu niuerfik Savalimmiunut iluanaaruteqarfiulluarsinnaasoq naliliisartut ilaata oqaatigaa.

Ruslandimi niuerfimmi siuariartortoqaqqinnissaa Savalimmiuni aalisartut peqatigiiffiata aamma naatsorsuutigaa.

Atlantikup avannaani Ruslandimut pilersuisutuaalersut

- Savalimmiunit Kalaallit Nunaanniillu avaleraasartuunik nioqqutigineqartut soorunami amerliartussapput, taakkuuppummi Atlantikup avannaanit Ruslandimut pilersuisutuaasut, Jógvan Jespersen, Savalimmiuni aalisartut peqatigiiffianni Farose Pelagic Organisationimi pisortaq taama oqarpoq.

Ruslandimi aalisartut peqatigiiffiata siulittaasuata Alexandr Fominip Ruslandimi niuerfimmi akit 20 procentit tungaannut qaffannissaat naatsorsuutigaa, kapisilinnimmi, ammassassuarnik avaleraasartuunillu amigaateqartoqalertussaassammat.

Pingaartumillu kapisilinnut akigitinneqartut Ruslandimi qaffariaateqarsimapput, tamatumalu malitsigisaanik nunanit Ruslandip eqqussuinnginnissamut ilaatinngisaanit piumasaqarneq annertunerulissaaq.

- Taamaammat Savalimmiut aamma Kalallit Nunaat isumaqatigiinniarfigineqarput, Alexandr Fomin aviisimut Berlingske Businessimut taama oqarpoq.