Ruslandip Ukraine saassummaguli ukrainemiut Norgemut qimaasut aatsaat taama ikitsigilertut

Ruslandip Ukraine 2022-mi februaarimi saassummaguli ukrainemiut Norgemut qimaasut aatsaat taama ikitsigilerput.

Norgemi nutaarsiassaqartitsivik NTB taama allappoq.

Ukrainemiut 1658-it Norgemut nunasinissamut ukioq manna januaarimi qinnuteqarput, februaarimilu marsimilu katillutik 1350-ingajaasimallutik. Norgep nunanut allanut tunngasuni aqutsisoqarfiata kisitsisaataasa tamanna takutippaa.

Assersuutigalugu Ukrainemit Norgemut qimaasut siorna septembarimi oktobarimilu 4500-t missaanniipput.

Qimaasut siorna ukiakkut amerlanerat Norgemi kommuninut ajornartorsiulersitsivoq.

Norgemi naalakkersuisut tamanna pillugu malittarisassanik arlalinnik allannguipput, ukrainemiut kommunini atasiakkaani inissinneqarsinnaanissaat siunertaalluni.

Norgemi naalakkersuisut suliniutinik nutaanik aamma siunnersuuteqaqqammersut nutaarsiassaqartitsiviup allaaseraa.

Meeqqanut tapiissuteqartoqarsinnaaneranut pisinnaatitaaffik ilaatigut peerniarneqarpoq. Tassa, ukrainemiut Norgemut qimaasut meerallit ikinnerusunik tapiissuteqarfigineqartalissapput.

Ukrainemiut 20.000-t Norgemut nunasinissaat naatsorsuutigineqartoq, Norgep 2024-mut aningaasanut missingersuutaani siorna oktobarimi saqqummiunneqartumi takuneqarsinnaavoq, allallu 5000-t Norgemi nunasinissamut qinnuteqassangatinneqartut aamma naatsorsuutigineqarluni.

Qimaasulli amerlanerullutik 37.000-unissaat kingorna ilimagineqalerpoq.

Taamaattorli Norgemi kommunit qimaasunik ikinnerusunik tigusinissartik kingorna akuersissutigaat.

Ukrainemiut 27.000-t maannamut Norgemi maannamut nunasisimapput, tassa ilimagisamit 10.000-nik ikinnerullutik.