Rusland: Issittoq pillugu suliami nunat pineqartut suleqatigiipput
Piumasaqaatit Naalagaaffiit Peqatigiit nunarsuarmi nunaviit qanoq imminnut atanerat pillugu ataatsimiittartoqatigiivinut nassiunneqareersullu, Russit nunanut allanut tunngasunut ministeeriaqarfiata oqaaseqaateqarluni aaqqiissuteqartoqarnissaa ukiuni qulini 15-inilluunniit utaqqineqartariaqassasoq oqaatigaa.
Ministeeriaqarfiulli eqqissisaalluni allannera Barents Observerimit issuarneqartumi oqaatigineqarpoq, Danmark Ruslandilu suleqatigiilluartut issuaaneq allartippoq: “Issittoq pillugu suliami nunat pineqartut suleqatigiipput, taamalu suleqatigiinnerat ingerlatiinnarneqassalluni”.
- Danmarkip pilersaarutai ilisimavavut, tassa Danmarkip nunaviit toqqaviannut atatillugu piumasaqaatai Qalasersuarmik piginnittuunissamik ilaqartut nalunnginnatsigik, ministeeriaqarfimmit allapput.
Aamma atuaruk Greenpeace russit piumasaaqaat pillugu: Silaaruttutut salliuniarnermut alloriarnerussaaq
Ruslandip piumasaqaatimisut saqqummiuteqqitai annertusineqarsimasut immap naqqata ilaanik 1,2 millionit kvadratkilometerimik annerussusilimmut tunngasuuvoq, Danmarkilli piumasaqaataa 2014-imi decembarimi saqqummiunneqartoq 895.000 kvadratkilometerinik annertussuseqarluni.
Piumasaqaatigineqartut ukiormanna isummerfigineqarnavianngitsut, naalagaaffiit Peqatigiit oqaaseqartitaata oqaatigaa. Naalagaaffiit Peqatigiit kommissionianni februaarimi marsimiluunniit oqaluuserisassatut inissinneqassasoq oqaatigineqarpoq.
Kommissioni siunissami aalajangiussereerpat, Russit nunanut allanut ministeeriaqarfianit oqaatigineqartut naapertorlugit “aaqqiagiinngissutaasinnaasut ilaatigut inuiaat pisinnaatitaanerannut aalajangersarneqartunut aalajangigassanngortinneqassasut oqaatigineqarpoq”.
Aamma atuaruk Issittup imartaanik piginnittuulernissamik Rusland piumasaqaateqartoq
Danmark Naalagaaffiit Peqatigiit kommissioniannut siorna nassiussimmalli, immap naqqata ilaanut piumasaqaatigineqartut Ruslandip Canadallu piumasaqaataanut assingunerat paasinarsereerpoq.
