Rusland danskit illersornissaqarfiata qarasaasiaannut pulasarsimasoq
Rusland danskit illersornissaqarfiata qarasaasiaannut 2015-imi 2016-imilu unioqqutitsilluni pulasarsimavoq. Danskit illersornissamut ministeriat, Claus Hjort Frederiksen (V) Berlingskemut taama oqarpoq.
- Aaqqissuussamik iliuuseqartoqarpoq. Qarasaasianut nuannariinnarlugu pulasartoqatigeeqqat taamaaliunngillat.
- Russit isertorlutik paasiniaasartuinut russilluunniit naalakkersuisuini qitiusumik inissisimasunut attuumassuseqarpoq. Pulatinnaveersaarnissaallu ilungersuutigiuarparput, Claus Hjort Frederiksen Berlingskemut oqarpoq.
Saassussinerit danskit illersornissaqarfiata isertortumik paasiniaasartuisa ataanniittup Center for Cybersikkerhedip nalunaarusiaani allaaserineqarput.
Unioqqutitsillutik qarasaasianut pulasartut paasissutissanik isertugaanngitsutut taaneqartunik pissarsisimasut nalunaarusiami allaqqavoq. Taamaattoq Danmarkip isumannaatsuuneranut innarliisinnaavoq.
Russimmi paasissutissat atorlugit danskit illersornissaqarfianeersunik kilitsissiassarsiorsinnaasut, nalunaarusiami allaqqavoq.
E-mailinut isertugaanngitsunut kingusinaarluni isumannaallisaasoqarsimammat saassussisoqarsinnaasimasoq ministerip oqaatigaa.
Berlingske naapertorlugu qarasaasianut pulasartoqatigiit APT28-kkut, Fancy Bearimik aamma taaneqartartut, saassussisuupput.
Taakku IT-mut isumannaallisaanermut ilisimasalinnit amerikameersunit russit isertorlutik paasiniaasartuisa qarasaasianut pulasartuiusorineqarput.
