Rubinisiorfik annertunerujussuarmik iluanaarutaasussanngortoq
Tamanna aatsitassarsiortitseqatigiiffiup True North Gems Greenlandip imminut akilersinnaassutsimik misissuisimanera upperissagaanni Namminersorlutik Oqartussanut iluanaarutaalluassaaq, misissuisitsinerit Naalakkersuisunut akuerisassanngorlugit tunniunneqarput.
Nalilersuilluni misissuinermi suliffeqarfik ukiut qulingiluat ingerlaneranni tunisassiornissamut pilersaarutaani akitsuummik royaltymik katillugit 930 millionit koruuninik akiliuteqartassaaq siullermik naatsorsuutigisamit 90 milllionit koruuninik akiliuteqartartussatut naatsorsorneqarsimagaluartumit.
90 millionit koruunit naatsorsorneqarput 2008-mi rubinisiornissamut siullermeerluni qinnuteqartoqarmat.
AAMMA ATUARUK Rubinisiornissamut qularinnikkunnaarput
Taamanili rubininik tuniniaaneq nunarsuarmi allannguuteqarsimavoq, True Nortn Gemsimi pisortaq Bent Olsvig Jensen aviisimut Sermitsiamut taama oqaluttuarpoq.
- Matumanili rubinit akiinut tunngatillugu akit annertuumik qaffariaateqarput tamatumalu saniatigut aatsitassarsiorfimmik sanaartorneq ingerlatsinerlu ilimagisatsinnit akikinnerussalluni, Bent Olsvig Jensen oqarpoq.
Aatsitassarsiortitseqatigiiffiup ukiuni qulini atuunnermini 3,1 milliardit koriunit kaaviiartissallugit nalilerpaa, suliffiillu nutaat 80-it pilersinneqarumaartut taakkualu 75 procentii tassalu katillugit 60-it missaanniittut Kalaallit Nunaanni pissarsiarineqarnissaat rubinisiorneq aallartippat ilimagineqarluni.
Rubinit safirillu piiarneqartut Qeqertarsuatsiaani sequtserneqassapput kingornalu immikkoortiterneqassallutik, kingorna pinnersaasiassat passunneqanngitsut salinneqassapput tamannalu Nuummi laboratoriami ingerlanneqartarnissaa True Norths Gems Greenlandip eqqarsaatigaa.
Pinnersaasiassat silineqartarnissaat nunani allani assersuutigalugu Kangiani suliarineqartarnissaat naatsorsuutigineqarpoq.
- Taamaammallu inuiaqatigiinnut isertitaqartitsinissarput kiisalu suliffeqarfittut ingerlalluartuunissarput qularutissaanngilaq, True North Gemsimi pisortaq aviisimi Sermitsiami apersorneqarluni taama oqarpoq.
