Politikerit nunatta aatsitassarsioqatigiiffinnut pilerinarnerulersittariaqarpaat, Martin Shalmi, Xploration Services Greenlandimi siulersuisuni siulittaasoq ingerlatseqatigiiffimmillu pilersitsisoq taama isumaqarpoq.

Aatsitassarsiortut: Royaltyp atorunnaarsinneratigut amerlanerusut sulilersinneqarsinnaapput

Aningaasalersuisartut nangaajunnaarsinneqassappata aatsitassarsiornerlu nunatta aningaasaqarnermut iluanaarutaanerulersinneqassappat, taava royaltymik akileraarusersuineq atorunnaarsinneqartariaqarpoq. Suliffissat ingerlatseqatigiiffiit akileraarutaannit pingaarnerutinneqartariaqarput, aatsitassarsiornermik suliallit ilaat taama oqarpoq.

Rubinisiorfiup Aappaluttup sapaatit-akunnerata siuliani ammarneqarnera aatsitassallu akiisa qaffakkiartornerat, aatsitassarsiornermut tunngatillugu allanngorfiusinnaavoq, politikerilli nunatta aatsitassarsioqatigiiffinnut pilerinarnerulersittariaqarpaat.

Martin Shalmi, Xploration Services Greenlandimi siulersuisuni siulittaasoq ingerlatseqatigiiffimmillu pilersitsisoq taama isumaqarpoq.

Shalmi naapertorlugu, aatsitassarsiornermik suliniutinut royaltymik akileraarusersueriaaseq Naalakkersuisut atorunnaarsittariaqarpaat. Royaltylersuinikkummi aatsitassarsioqatigiiffiit tunisassiulernerminni ingerlaannaq akileraartussaatitaapput ingerlatsinikkut sinneqartooruteqalerunik aatsaat akileraartalertussaanatik.

AAMMA ATUARUK Rubinisiorfik iluatsitsiffiulersinnaalersoq

- Ingerlatseqatigiiffinnut akiligassaminnik akilersuinermikkut angummanniartunut, immaqalu tunisassiornikkut aallartilluarsimanngitsunut ilungersunartupilussuuvoq piiakkaminnit royaltymik akiliisussaammata, Shalmi taama oqarpoq.

Royaltymik akileraarusersueriaaseq 2013-imi Inatsisartunut qineqqusaarnermi sammineqarpoq, taamatullu aaqqissuussineq kingorna Naalakkersuisunit Hammondip siuttuuffigisaanit eqqunneqarluni.

Royaltylersuinerlu aatsitassarsiornerup iluani taamanili iluarineqanngilaq.

Christiansen: Ingerlatseqatigiiffiit suli iluanaarutiginngisaminnit akileraartassapput

Kommune Kujallermi aatsitassarsiorneq pillugu siunnersortip ujarassiuullu, Ole Christiansenip, aamma uparuarpaa.

Nunatta Frasier Institutesip nunanut aatsitassarsiorfiusunut allattorsimaffiani normu 6-itut inissisimasinnarluni 2016-imi normu 55-inngortinneqarnerata kingorna, Kommune Kujallermi aatsitassarsiorneq pillugu siunnersortip ujarassiuullu, Ole Christiansenip, royaltylersuinerup ajornartorsiutaanera aamma uparuarpaa.

- Piiaaviliussagaanni aningaasarpassuit atorneqartariaqarput, ullormillu siullermit akileraartussaatitaanikkut suli aningaasatigut iluanaarutigineqarfiunngitsut akileraarutaasussaapput, Ole Christiansen marsip qaammataani taama oqarpoq.

AAMMA ATUARUK Nunatta ajornartorsiutai nuisinneqarput

Syddansk Universitetimi lektorip aatsitassarsiornermillu ilisimatuup, Knud Sindingip, aviisimut AG-mut oqaatigaa aatsitassarsiortut ingerlatseqatigiiffiit akileraarutaannik nalinginnaasunik akiliinatik royaltymik akiliisarnissaannik Naalakkersuisut aalajangiusimasaqarnerat paasisassaanngitsuusoq, tamanna aningaasaliisartunut nangaalersitsisinnaammat.

Martin Shalmi isumaqarpoq royaltylersuisarneq atorunnaarsinneqarpat suliniutit amerlanerusut aallartinneqarsinnaassasut:

- Aamma taamaaliortoqarneratigut kommunit nunattalu karsia inuit sulilersut isertitaminnit akilaarutaat iluanaarutigissavaat. Kalaallit Nunaannut, najukkami aningaasaqarnermut, nunatta karsianut aammalu nammineq naleqassutsimik misigisimanermut pingaaruteqartupilussuussaaq, Kalaallit Nunaannut tamarmut iluaqutaasussamik pilersitseqataaneq ilisimagaanni, Martin Shalmi taama isumaqarpoq.

Aatsitassanut naalakkersuisoq Múte Bourup Egede (IA) KNR-imut mailikkut allappoq aatsitassarsiorneq pillugu iliuusissap tulliata suliarineqarneranut atatillugu royaltylersuinermik aaqqissuussinermik misissueqqissaarisoqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!