Royal Run aavarfiup nalaani

Royal Run, Danmarkimi maajip 24-at pisussaagaluartoq septemberip aqqaneq aappaannut kinguartinneqarpoq corona pissutigalugu.

Aamma pilersaarutaagaluarpoq Royal Run Nuummi pissasoq inuuissiortoq pillugu Danmarkimi arpatsitsineq naammasseriitsiarpat.

- Kinguartitsineq tusaatissatut tiguarput neriuppugullu septemberi naatinnagu Royal Run Nuummi pisinnaassasoq, Royal Runimik Nuummi aaqqissuussisoq Kim Godtfredsen KNR-mut oqarpoq.

Royal Run siullerpaamik siorna Nuummi pisussaagaluarpoq. Coronali pissutigalugu tamanna aamma taamaatiinnarneqarpoq.

AAMMA ATUARUK Royal Runernissaraluaq taamaatittoq – Nuummili aappaagu maajimi pissaaq

- Peqataaniarlutik nalunaartut taamanikkut 700-t sinneqaraluarput 500-llu nalunaarsimanertik attatiinnarpaat arpannissamut nutaamik ulluliisoqarpat peqataaniarlutik, Kim Godtfredsen oqarpoq.

Pileritsassaarutaasoq

Kamiit arpaatit Royal Runimut siullerpaamik 2018-mi ungersorluarneqarput Kunngissaq Frederiup 50-nik ukioqalernera malunnartinniarlugu. Aamma pilersaarutaagaluarpoq siorna Nuummi Royal Runimi peqataanissaa.

- Soorunami nerioqaagut ilaquttani tamaasa ilagalugit Nuummi Royal Runimut peqataajartorumaartoq, Kim Godtfredsen oqarpoq.

AAMMA ATUARUK Nuummi Royal Runertoqarnissaa aggustimut kinguartinneqartoq

Isorartussutsit pingasut Royal Runimi arpaffigineqassapput. Taakku tassaapput 1.500 meter, 5 kilometer aamma 10 kilometer.

- Arpatsitsinissamut tikissinnaassaguni arpaqataanissamut pilerilersitsissaqaaq. Aamma Danmarkimi Royal Runimik aaqqissuussisartuniit ilisimatinneqarpugut Nuummi arpatsitsinermut peqataanissaminut pilerisuttoq, Kim Godtfredsen oqarpoq.