Royal Greenlandip ingerlatsinera RAL-ip ajornartorsiorneranit eqqugaasoq
Containerinik imaqanngitsunik palletsinilu pilersuilluannginnermi nalorninartorsiortitsinerit, kilisaatinik usingiaasinnaannginnerit aamma umiarsuit containerinik pilersuisussat tikinnissaat nalorninartullit Royal Greenlandip nunatsinni suliffissuini 38-usuni ajornartorsiutigineqarput.
Ajornartorsiutillu ima annertutigaat Royal Greenlandimi nunami imaanilu ingerlatsineranut maanna sunniuteqarlutik. Pingaartumillu Maniitsumi suliffissuaq ajornartorsiuteqarfiuvoq matoqqajaallunilu, Royal Greenland nittartakkamini taama allaaserisaqarpoq.
AAMMA ATUARUK Erik Jensenip RAL nammineeqquaa
AAMMA ATUARUK RAL-ip ajornartorsiutai pillugit Sanaartornermut ataatsimiitsitaliaq nassuiaaneqarusuttoq
Maniitsumut containerinik imaqanngitsunik pilersuisoqannginnera pissutigalugu suliffissuup qerisuusivissua maanna ulikkaarsimalluni. Qerisuusivillu ulikkaaqqatillugu tunisassiorneq ingerlaqqissinnaanngilaq, Royal Greenland taama allappoq.
Allaalluunniit aalisakkat sikulersukkat piumaneqaqisut tunisassiarisinnaajunnaarpagut, tassa umiarsuit tikittussat qanoq isiallannerinnakkut allanngortinneqartartut pilersaarusiornissatsinnut periarfissiisinnaanngimmata, Susanne Marie Knudsen Royal Greenlandip Maniitsumi suliffissuani pisortaq oqarpoq.
AAMMA ATUARUK KNI-p RAL qatsutivippaa
Upernaviup pigisaani Saqqamilu tunisassiorfiit palletsissaaleqinikkut aamma eqqugaasorujussuupput, Saqqami tunisassiorfik palletsissaminik qaammatini marlunni utaqqisimalluni.
Akimmisaaruterpassuilluunniit eqqaaginnarlugit avannaani sikuppat pilersuinerup usingiarsinnaanerullu tungaatigut Royal Greenland, aalisakkanik tunisassiorfissuaq taama naggasiivoq.
