Royal Greenland nunarsuarmioqatigiinnut akuuvoq
Danmarkip tapiissutaanik isumalluuteqarpallaarunnaarluta nammineernerulissagutta nunanik allanik niueqateqarnerput annertusisariaqarpoq, taama naalakkersuisooqatigiit anguniagassatut siunniussaqarput. Siunniussarlu nunatsinni suliffeqarfiit ikittuinnaat ullumikkut malunnaatilimmik eqquutsippaat. Eqquutsitsisunut ilaavoq Royal Greenland. Suliffeqarfiullu nunani allani ingerlataminik annertusiartortitsinera nunatta nunarsuarmioqatigiinnut akuliukkaluttuinnarneranik takutitsivoq.
Nunarsuarmioqatigiit killeqarfiit akimorlugit niueqatigiinnikkut qanilliartorneranni nunarput qanoq inissisimava? Apeqqut tamanna pillugu Namminersornerullutik Oqartussat nunanut allanut allaffeqarfiat ullumi paasiniaaqatigiissitsivoq. Paasiniaaqatigiissitsinermilu pisortanit suliffeqarfinnillu assigiinngitsunit peqataaffigineqartumi, saqqummeeqataavoq nunatsinni suliffeqarfiit annersaat Royal Greenland. Royal Greenland-ip nunarsuamioqatigiinnut akuliukkiartuinnarnissaa pisariaqartoq, suliffeqarfiup pisortaata tullia Henrik Leth oqarpoq:
-Royal Greenland nunarpassuarni Afrika Australialu minillugit immikkoortortaqarfeqarpoq, ullumikkullu ima angitigilersimavoq, nunatsinni tunisassiat assigiinngitsut ukiumut katillutik 48.000 tonsiusut, Royal Greenlandip nunatta avataani suliffissuisa tunisassiaanut naleqqiullutik pingajorarterutaannaallutik Leth oqarpoq, oqaatigalu nunatsinni tunisassiat ukiuni tulliuttuni 3,5 procentimik annikilleriarnissaat naatsorsuutigigitsik.
- Nunatsinni aalisakkerivitta tamakkerlutik ukiumut tunisassiarisartagaasa Tysklandimi aalisakkeriviutitta ataatsip ukiumut naammassisarpai, taamaattumillu
Royal Greenlandip nunani allani tunisassiani iluanaaruteqarfiginerpaasarpai, taamaattumillu suliffeqarfiup namminersortunngorsarneqarnissaa pisariaqarpoq Leth oqarpoq.
Nunani allani pisiniarfissuit tunitsivigisartakkagut kattussuuttut suleqatiginagit ingerlatsiniaraluarutta malinnaasinnaanngilagut, kisimiillutami neqerooruteqarnissamut nukissaqanngilagut. Taamaattumik iluanaassagutta namminersortunngorsaanissaq, tassa allanik suleqateqarnissarput avaqqunneqarsinnaanngilaq, Henrik Leth oqarpoq. Namminersortunngorsaanerullu aqqani imminut pilliutiginissaq ernummatigisariaqarsorinngilaa.
- Malinnasariaqarpugut, pisiniarfissuimmi suleqatigiinnissamik aalajangernissarput utaqqiunnanngilaat, aalajangerniaasaartugummi allanik suleqatissarsiunnarsinnaapput, Henrik Leth oqarpoq.
Royal Greenlandillu ullumikkut katillugit 2000-inik sulisoqartup nunani allani tunisassiorsiifisa amerliartuinnarnissaat ilimagisariaqarpoq. Namminersornerullutik Oqartussat Royal Greenlandip niuernerpalaartumik ingerlanneqarnissaa 1998-imi aalajangiummassuk, suliffeqarfiup nunani allanik suleqateqarnissaq tunngavigalugu ingerlatsinera maannamut iluatsilluarsimasoq Henrik Leth isumaqarpoq.
