Royal Greenland naatsorsuutitigut ingerlalluartoq

Royal Greenlandip 2016-imut naatsorsuutai aatsaat taama angusaqarfiulluartigipput. Aalisakkanillu suliffeqarfissuarmi suli ingerlalluartoqartoq suliffeqarfissuup ukiup affaanut naatsorsuutaani atuarneqarsinnaavoq.

Siorna ukiup qaammataani siullerni arfinilinni angusanut sanilliutissagaanni, kaaviiaartitat 9 procentinik, imaluunniit 200 millionit koruunit missaannik qaffariaateqarfiupput sinneqartoorutillu 39 millionit koruuninik qaffariaateqarfiullutik.

Pingaartumillu raajanik saattuanillu nioqquteqarneq taama pitsaatigisumik angusaqarnermut pissutaapput, raajanilli seernartulikkanik, nipisat suaannik pujuukkanillu tunisat aamma siuariartorfiupput. Royal Greenlandip tunisassiai pingaartumik Kangiani, Amerikami avannarlermi Skandinaviamilu piumaneqarput.

Suliffeqarfissuup ukiup affaanut naatsorsuutiminut atatillugu oqaatigaa Royal Arctic Linep ukiup ingerlanerani ingerlatsinikkut annertuumik ajornartorsiuteqarnera suliffeqarfimmut aamma ajornartorsiortitsisimasoq. Tamanna ilaatigut saarullinnik nioqquteqarnermut akornutaasimavoq, taakku 2016-imi qaammatinut siullernut arfinilinnut naleqqiullugu 5 procentinik ikileriaateqarfiusimammata.

AAMMA ATUARUK Ukiup qiteqqunnerani naatsorsuutini sinneqartooruteqarneruvugut

Raajanik tunisat aamma ikilerialaarsimasut Royal Greenlandip ukiup affaanut naatsorsuutimini oqaatigaa. Tamannalu akit apparsimanerinik tuluillu aningaasaata pundip tuluit Brexitimut angernerisa kingorna nalikillisimaneranik pissuteqarneruvoq.

Royal Greenland 2016-imi akileraarutit ilanngaatiginnginnerini 335 millionit koruuninik sinneqartooruteqarpoq. Naatsorsuutillu kingulliit immikkoorutigaat qaammatinut 15-inut naatsorsuutaammata. Qaammatilli ilassutaasut pingasut ilanngaatigigaluaraanniluunniit naatsorsuutitigut aatsaat taama angusaqarluartigaluni suliffeqarfissuup taamani ilisimatitsissutigaa.

AAMMA ATUARUK Royal Greenland naatsorsuutitigut aatsaat taama angusarissaartigisoq