Royal Greenland med de kongelige i USA
Amerikami niuerfimmi Royal Greenland siuariartortoq, tuniniaanermut nittarsaassinermullu pisortap Bruno Olesenip oqaatigaa.
- Kunngissap nuliatalu pisortatigoortumik tikeraarnerannut atatillugu, suliffeqarfiup amerikami niuerfimmi siuariartorluarnera tunngavigalugu, niuernikkut nittarsaassinermut Royal Greenland peqataavoq, KNR-imut e-mailikkut taama allappoq.
Canadami suliffeqarfik Quinsea Fisheries Royal Greenlandip 2015-ip naalernerani pisiaraa, tamatumalu kingunerisaanik Amerikami niuerfimmi kaaviaartitat malunnaatilimmik amerleriaateqarput.
- Saattuanik Canadameersunik pisisartut saattuanik, qaleralinnik, raajanik saarullinnillu Kalaallit Nunaanneersunik aamma soqutiginnittut paasinarsivoq, Bruno Olesen taama allappoq, Royal Greenlandillu piffissap pilersaarusiorfigisami iluani USA-mut tunisami marloriaatinngortinnissaanik naatsorsuuteqartoq aamma oqaatigaa.
Suliffeqarfiup USA-mut angalatitai tassaapput nunani tamalaani tuniniaanermi pisortaq Finn Laursen aamma avammut nioqquteqarnermi aqutsisoq Søren Eschen.
Kunngissap nuliatalu USA-mut tikeraarnerat ippassaani septembarip 27-ani aallartippoq inuussutissarsiornikkullu nittartaassinerup septembarip 30-ani naammassineqarnissaata tungaanut tikeraassapput.
Washington D.C aamma Boston tikeraarpaat.