Royal Greenlandip Canadami suliffeqarfik pisiarigaa
Suliffeqarfik pineqartoq tassaavoq Quin-Sea Fisheries, pisiarineratigullu atlantikup avannaani killeqarfiit akimorlugit suleqatigiinnerulernissamut alloriarnertut pingaarutilittut Royal Greenlandip isigaa.
Quin-Sea Fisheries saattuaanerusunik raajaanerusunillu ukiumut 11.000 tonsinit tunisassiorlunilu tunisaqartarpoq nunamilu suliffissuarnik arfinilinnik ingerlataqarluni.
Suliffeqarfiup ukiumut aningaasat kaaviaartittagai 60 millionit dollarsinit amerlanerupput tunisassiornerullu nalliuteruttorfiani inuit 700-t sulisorisarlugit.
Taamaammat Royal Greenlandip suliffeqarfimmik pisinini arlalitsigut iluaqutigisinnaassallugu neriuutigaa.
- Matumani pisineq arlalitsigut iluaqutissartaqassasoraarput. Quin-Seap tunisassiai Royal Greenlandip tuniniaasarfeqarfianit angisuujusumit nunanilu assigiinngitsuni immikkoortortaqartumit tuniniarneqartalissapput, uagullu Kalaallit Nunaata imartaani aalisakkat pissuseqatigiiaat maanna aalisarneq ajukkavut tassa siuteqqut imarmiut aamma inalugallit pillugit ilisimasaat iluaqutigisinnaavagut, Royal Greenlandip pisortaanera Mikael Thinghuus tusagassiorfinnut nalunaaruteqarluni taama allappoq.
