Royal Greenland-ip isumaqatigiissuta
Royal Greenland-ip Namminersortunngorsaanissamullu aningaasaliisartup Alfred Berg-ip isumaqatigiissutaat suliffeqarfissuarmut pituttuisuunani arlaata piumasaqarneratigut sukkulluuniit taammaatinneqarsinnaavoq.
Isumaqatigiissut ulluni kingullerni oqallisaaqisoq radioaviisimi pissarsiaraarput, tassanilu ilaatigut allassimavoq Alfred Bergip misissussagaa suliffeqarfissuup nunani allani ingerlatasa ilaat qanoq ilillutik tunineqarsinnaanersut.
Isumaqatigiissummi aamma allassimavoq ingerlatat arlaanik tuniniaanissamut Royal Greenland siunnersuisartunik allanik misissuisitsissanngitsoq, tassani nunani allani ingerlatanik tamanik ilaannilluuniit akigisaqarsinnaaneq eqqartorneqarluni.
Alfred Berg-ikkunnit misissorneqartussat pingaarnerit marluupput. Siullermik misissorneqassapput Royal Greenland-ip suliffeqarfiutai nunatsinniitut 14-iusut qanoq ingerlanneqarnersut. Taakku 750-nik sulisoqarput.
Aappassaanik misissorneqassaaq RG-p nunani tamalaani ingerlatsiviisa qanoq ingerlanerat. Tamatumani misissorneqassaaq niueqatigiinnermi pissutsit, nunani allani suliffeqarfissuup unammillertui, tamakkua aaqqissuusaanerat allallu.
Ilanngullugu misissorneqassaaq Royal Greenland-ip nunani allani ingerlataanik qanoq iliorluni tunisaqarsinnaaneq. Isumaqatigiissummullumi aamma ilaavoq qulaani pineqartut saniatigut Alfred Bergikkut allamik suliakkerneqassanngitsut.
