Royal Greenland Academy nunaqarfinni pikkorissaasoq
"Ileqqunik inooriaatsinillu allannguineq" qulequtsiullugu Royal Greenlandimi sulisut nunaqarfinneersut illoqarfinneersullu 100-nit amerlanerusut inuttut ineriartorneq suleqatigiilluarsinnaanerlu aqutsisutullu ineriartorneq pillugit qaammatit marluk kingulliit ingerlanerini pikkorissartinneqarput.
Allattoq Mads Lynge
novembarip 30-at 2015 07:38
- Suliffeqarfinni ataasiakkaani suleqatigiinnerup pitsaasup anguneqarnissaa pikkorissarnerni siunertaavoq. Ileqqunik inooriaatsimillu allannguineq pillugu pikkorissartitsinitsinnni qulequttat soorlu qinngasaaruttarneq, attaveqaqatigiinneq aammalu akerleriissuteqartarneq taamatuttaaq ileqqut suliffimmut sunniuteqarnerluttut qanoq allanngortinneqarsinnaanerinut tunngasut sammineqartarput, Royal Greenlandimi sulisoqarnermi immikkoortortaqarfimmi sulisoq Kathrine Andersen oqarpoq.
Royal Greenlandimi sulisut 510-t 2014-imi ukioq mannalu Royal Greenland Academymit aaqqissuunneqartunik pikkorissartinneqarnikuupput.
