Royal Greenland aatsaat taama sinneqartooruteqartigisoq
Royal Greenland akileraannginnermi aatsaat taama angusarissaartigisoq, suliffeqarfissuaq tusagassiorfinnut nalunaaruteqarluni taama allappoq.
Sinneqartoorutit siornamut naleqqiullugit 31 millionit koruuninik amerlanerupput, suliffeqarfissuullu aalisakkanik Atlantikup Avannaata imartaaneersunik nunarsuarmi pilersuisuni siuttunngornissaminik anguniakkani taamaalilluni qanilleriaqqiinnarpaa.
- Taama angusaqarnikkut Royal Greenlandip aalisakkanik Atlantikup Avannaata imartaaneersunik pilersuisutut nunarsuarmi siuttunngornissaminut anguniakkani aningaasaqarnikkut kiffaanngissuseqarfigilerlugulu nukissaqarfigilerpaa, tassa iliuusissatut pilersaarutitsinni The North Atlantic Championimi pilersaarutivut malilluinnarlugit, pisortaaneq Mikael Thinghuus oqarpoq.
Akiitsut ernialersukkat ukioq ataaseq matuma siorna 1,4 milliardit koruuniusut maanna 897 millionit koruuninut ikileriarsimapput.
Royal Greenland Wilhelmshavenimi suliffissuaatiminik tunisinermigut 1,2 milliardit koruuninik kaaviiaartitassaraluaminik annaasaqarpoq, niuernikkulli ingerlatani allani kaaviiaartitat 550 millionit koruunit missaannik amerleriartinneqarsinnaasimapput.
Suliffeqarfissuaq aamma allappoq saarullinnik tunisassiorneq suli annaasaqaataajuarsinnartoq, siornamulli naleqqiullugu annikinnerusumik, Royal Greenlandillu aalisariaatsinut tunisassioriaatsinullu nutaanut aningaasalersuinikkut tamatuma siumut-saatsinneqarsinnaanissaa sulissutiginiarpaa.
Aamma atuaruk Royal Greenland sinneqartoorpoq (2012-2013)
Aamma atuaruk Royal Greenland naatsorsuutimigut angusarissaartoq (2011-2012)
