Rosingip isornartorsiutai Vestergaardip eqqunngitsuunerarpai
Michael Rosingip Demokraatinit tunuarnini marlunngornermi nalunaarutigaa. Poul Hansen maajip qaammataani partiimit aamma ilaasortaajunnaarpoq.
Partiili ajornartorsiunngitsoq, siulittaasoq Randi Vestergaard Evaldsen oqarpoq.
- Ajornartorsioraluarutta sinerissami immikkoortortaqarfigut taama sikkerartigalutillu ineriartortiginavianngikkaluarput.
Demokraatit siulittaasuat Randi Vestergaard Evaldsen taama oqarpoq.
Demokraatit Michael Rosingip ilaasortaajunnaarnermik attaviitsunngornissamillu aalajangernera akueraat.
Michael Rosing Demokraatit partiitut isummersorfigisaat arlallit pillugit isornartorsiuereerluni partiimit ilaasortaajunnaarpoq.
Demokraatit Tasiilamut ikiorsiissutissanik 5 millionit koruuninik immikkut ittumik aningaasaliinissamik siunnersuuteqarsimanerat, Rosingip ilaatigut isornartorsiorpaa.
Justus Hansen illoqarfigisamini qinerneqarneruniassammat partii taama ittumik siunnersuuteqartoq, Rosing isumaqarpoq.
Rosing oqarpoq sumiiffiit ilaat allanit salliunneqartannginnissaat partiip politikkiata anguniagaa pisumi unioqqutinneqarmat partii qimallugu.
Nakkutilliiartortitalli nalunaarusiaat aallaavigalugu partii siunnersuuteqartoq, siulittaasoq erseqqissaavoq.
Nalunaarusiamimi allaaserineqarpoq Tasiilami imminortarneq, atornerluineq meeqqanullu kannguttaatsuliortarnerit amerlaqisut.
- Tassani takutinneqarpoq nunatta kangiani ajornartorsiutit amerlangaarmata immikkut iliuuseqartoqartariaqartoq, Randi Vestergaard Evaldsen oqarpoq.