Rockimik nipilersortartoq tusaamasaq USA-mi præsidentissatut qinigassanngortittoq
Hillary Clinton Donald Trumpilu præsidentinngorniuunnermi qinersisartunit iluarineqarpallaanngitsut, qinersisartut isumaannik misissuinerit arlallit takutippaat.
Tamannalu amerikami rockimik nipilersortartut tusaamasat ilaata immaqa atorluarsinnaavaa.
68-inik ukiulik Alice Cooper ataasinngormat nalunaarpoq præsidentimut novembarimi qinersisoqarnissaanut qinigassanngortilluni, qineqqusaarninilu qulequtsersimavaa "A Troubled Man for Troubled Times".
Præsidentimullu qinigassanngortinninni qanoq pimoorutsigineraa qineqqusaarutaani immaqa erserpoq.
Angutip takisuunik taartunik nujallip, isimi sinaatigut taartumik qalipassimasup tusarnaartitsigaangamilu pulateriaarsunnik iperaatanillu atuisartup, quiasaarisartup Groucho Marxip amerikamiut 50-dollariini assitaliunneqarnissaa sulissutiginiarpaa.
Aamma Lemmy Kilmisteriugaluup, Motörheadimi erinarsortuusup, qaqqamut Mount Rushmore amerikamiut præsidentiisa sisamaasut eqqaassutissatut qiperugaaffiannut ilanngunneqarnissaa kissaatigaa.
Nunanullu allanut politikkimut tunngatillugu, Cooperip præsidentinngoruni Tuluit Nunaannut kajumissaatiginiarpaa tuluit aningaasaataat pundit isiginnaartitsisartumik Peter Sellersimik assitalersorneqassasut.
Alice Cooper, 1970-ikkunni nipilersoqatigisarsimasaminik taama taaguuteqartoq, Clintonitut Trumpitullu qineqqusaarnermi sulisorpassuaqanngilaq.
Qineqqusaarnerminilu maannamut nittartakkaminit merchandicenik tuniniaavoq 1972-imilu nuusiani "Elected" saqqummerseqqissimallugu.
Erinarsuut præsident Nixonip qineqqusaarnerani nuannarineqarlualertup politikerip neriorsuutaanik naggaserneqarpoq: Tamatta ajornartorsiortarpugut, uangali soqutiginngilara.
Cooperip præsidentinngornissaminik takorluugai ilimanaateqarpallaanngikkaluartut, nutaarsiassaqartitsiviup AFP-p oqaatigaa, Donald Trump præsidentimut qinigassanngortinnissaminik takorluugaqarnerminik saqqummiussimmat aamma periarfissaqarpallaanngitsutut oqaatigineqarsimavoq.
Kingornali Trumpip politikkikkut unammillertini tamaasa ajugaaffigai Republikanerillu præsidentimut qinigassanngortitassaattut toqqarneqarluni.
Alice Cooperip erinarsuusiai nuannarineqarluartut ilaat tassaapput "I'm Eighteen", "School's Out" aamma "No More Mr. Nice Guy", politikkimillu soqutigisaqannginnini siornatigut aamma oqaatigisarsimallugu.
/ritzau/AFP
