RG-p tunisassiortoqanngikkallarnerani sulisut pikkorissartikkai
Maniitsumi Royal Greenlandip tunisassiorfiata tunisassiunngikkallarnerani tunisassiorfimmi sulisut 75-it pikkorissartinneqarput. Maniitsumi tunisassiorfik decembarip 15-iani tunisassiorunnaarallartoq januaarip 23-iani tunisassioqqilissaaq.
Qaleraliit tunisassiassat uninngasuutit marsip 31-iata tungaanut tunisassiorsinnaajumalluni juulleriartornerani juullillu kingorna tunisassiorneq unitsikkallarnissaa aalajangiunneqarsimavoq. Kingusinnerusukkut qaammatini marlunni tunisassiorfiup matoqqasariaqalernissaa pinngitsoorumallugu juulleriartorneraniit januaarip 23-iata tungaanut matoqqanissaq toqqarneqarluni.
- Tunisassiunngikkalarnitsinni sulisut 75-it tunisassiornermut tunngasunik pikkorissassapput allallu qulit eqqiaanermut tunngasunik sapaatip akunnera una tullialu pikkorissassallutik, Maniitsumi Royal Greenlandip tunisassiorfiani ingerlatsisoq Susanne Marie Knudsen Royal Greenlandip nittartagaanut oqarpoq.
Sulisut pikkorissartinneqarnerat Royal Greenlandimi Sulisoqarnermi Pikkorissartarnermilu Immikoortortaqarfimmi sulisut aammalu Inuussutissalerinermi Ilinniarfiup Inuilip sulisuinit ingerlanneqassaaq.
Tunisassiorfimmi sulisut aqutsisui aamma allaffissornikkut suliaqartut tunisassiornerup unitsikkallarneqarnerani angerlatinneqarnikuunngillat. Aamma tunisassiorunnaarallarnerup nalaani aalisartut pisaminnik tunisisarnerat unitsinneqanngitsoq Royal Greenland allaaserisaqarpoq.
