Qulaarpaa Angalatitsisartoq najukkami suliniutinik ujartuisoq
Qallunaaq Kasper Trolsgaard takornarianik Kalaallit Nunaannut ukiuni 20-ni angalatitsisarpoq. Taannali ujartugaqarpoq, Kalaallit Nunaanni takornarianik sullissisartunik isumassarsiullaqqissunik iluanaarutigisinnaasaminnillu pilersitsisinnaasunik.
- Illoqarfinni nunaqarfinnilu takornarianik sullississunik amerlanerusunik peqannginnera annerilaarpara, Kasper Trolsgaard angalatitsivimmik Arctic Friendimik piginnittoq taama oqarpoq. Kasper takornarianik ukiut tamaasa Kalaallit Nunaannut aallartitsisarpoq, taassumali uggornartippaa takornarianik sullississartunik nunatsinni amerlanerusunik suleqateqannginnami.
- Qularutigineqassanngilaq, takornariat kalaallinit kiffartuunneqarnissartik orniginartinnerugaat, qallunaanit tyskinillu kiffartuuneqarnissaminngarnit, Kasper Trolsgaard oqarpoq.
Aamma atuaruk Takornariaqarnerup inerisarnissaa suliassarujussuuvoq
Aningaaserivimmi Grønlandsbankenimi pisortap tulliata John Jakobsenip, takornarianik sullisserusuttunik aningaaserivimmut saaffiginnittoqartarnera uppernarsarpaa.
- Isumaqarluinnarpunga takornarianik sullissiniartut ikippallaarujussuartut, pingaartumik takornariaqarneq nunatsinni inuussutissarsiutigineqartuni pingaaruteqartutut inissisimanissaa oqaluuserineqartarmat, taamaattumik isumaqarpunga takornarianik sullissiniartut ikittuinnaat uagutsinnut saaffiginittarput, John Jakobsen oqarpoq.
Namminersortut suliniuteqarnerunissaannik takornarianik angallassisartumit Kasper Trolsgaardimit ujartorneqartoq nutaarsiassamik nuannersumit aallaaveqarpoq.
- Takornarianik sullissinerup ukiuni kingullerni 17-ini ineriartortinneqanerani ukiut kingullit pingasut ineriartornerusoqarpoq.
Pingaartumik takornariat suminngaaneersuunerat allanngoriaateqarsimavoq Kasper Trojlgaard isumaqarpoq.
Aamma atuaruk Naalakkersuisut takornarianik amerlanerusunik takunissartik qilanaaraat
Takornarianik angalatitsisarfik Arctic Friend takornarianut pingaartumik Danmarkimeersunut tunisaqartarpoq, ullumikkulli Arctic Friend aqqutigalugu takornariat nunanit allaneersut affaat tikillugit nunatsinnut angalasarput, takornariarusuttullu aatsaat taama amerlatigipput.
Taamaattumik takornarianik sullissinerit assigiinngitsut niuffatigineqarsinnaapput. Takornarianik kiffartuussinerit tamangajammik amigaatigineqarput.
- Takornarianik angallassinerit arlaqartut ineriartortinneqarsinnaapput, unnuisarfiit aamma tammajuitsussarsiniarfiit ineriartortinneqarsinnaapput taakkuuppummi takornariat aningaasatiminnik atuiffigerusutaat Kasper Troljsgaard oqarpoq.
John Jakobsen Grønlandsbankenimeersoq naapertorlugu suliffeqarfinnik namminersortunik aallartitsinissamik periarfissaqarluarpoq, eqqarsarluartoqartariaqarlunilu.
- Eqqaamasariaqarpoq eqqarsarluartoqartariaqarmat suna tamaat eqqarsaatigineqassalluni; tuniniagaq kiap pisiarerusuppaa, qanoq tuniniarneqassava minnerunngitsumillu inuussutigineqarsinnaava, John Jakobsen Grønlandsbankenip pisortaata tullia taama oqarpoq.
Arctic Friend unnuisarfimmik 24-nik siniffigineqarsinnaasumik Ilulissani 2015-mi ammaavoq, Kasper Trojlsgaardillu maanna eqqarsaatigilereerpaa unnuisarfik alliniarlugu.
