Pilersaarusiaq pingaarnersiuinermi tunngaviusinnaanngitsoq
Nuna tamakkerlugu pilersaarusiap illoqarfinni nunaqarfinnilu isumalluutinik tulleriiaarinerinissaq pillugu paasinerluinermik oqaasertaliussaqarnera ilaatigut pissutaalluni Inatsisartut ukiakkut atatsimiinnerannit sapaatit akunnerata siuliani oqaluuserisassaajunnaartinneqarpoq,
Isumalluutinillu aningaasaliinissamullu tulleriiaarissagaanni eqqarsaatigisassarpassuaqarpoq, nunalu tamakkerlugu pilersaarusiap nassuiaataani eqqarsaatigisassatut toqqarneqarsimasut naammanngitsut, Kåre Hendriksen isumaqarpoq.
- Paasiuminnaattorpassuarnik isumaliuutiginnittoqartariaqarpoq. Uanilu paasissutissaataat tunngavigalugit inerniliisoqarsinnaanngilaq, Kåre Hendriksen oqarpoq.
Illoqarfiit nunaqarfiillu inuiaqatigiivisa agguaqataarnerisa allaatigisaanerat aamma innaallagiamik imermillu pilersorneqarnerat ilaatigut tunngavigalugit nassuiaammi tulleriiaarisoqarpoq.
Taakkuli naammanngillat. Nunami tamakkerlugu pilersaarusiaq aningaasaliiffigisassanik tulleriiaarinermut atortussaavoq, taamaammat sumiiffinni ataasiakkaani inuussutissarsiornermut ineriartornissamullu qanoq tunngaveqartoqarnersoq misissuisoqarnisssaa pingaarluinnartuusoq, Kåre Hendriksen isumaqarpoq.
- Najugaqarfiit ataasiakkaat napanerinut suut tunngaviunersut misissorneqarsimanngillat. Tassa najugaqarfinni suna inuussutigineqarpa, sunalu inuussutigineqarsinnaava? Misissueqqissaartoqanngippallu sumiiffiit ataasiakkat ineriartornissamut qanoq periarfissaqarnersut paasineqarnavianngilaq, Kåre Hendriksen oqarpoq.
Inuussutissarsiornermut tunngaviusut periarfissaasullu tulleriiaarinermut aalajangernernissami pingaaruteqartupilussuusut nuna tamakkerlugu pilersaarusiami allaqqavoq.
Taakku ukioq mannamut nassuiaammi ilaatinneqarusussimagaluarput, aappaagumullu nassuiaammut ilanngunneqarnissaat sulissutigineqartoq, nalunaarusiami allaqqavoq.
