Rasmus Lyberth DMA Folkimi nersornaatisisoq
Rasmus Lyberth nersornaasiuttakkanut pingasunut innersuunneqarsimavoq, tassalu ukiormanna saqqummersitamut, ukiormanna erinniortumut ukiormannalu erinarsuusiortumut nersornaasiuttakkanut.
Rasmus Lyberthilu ukiormanna erinarsuusiortumut nersornaasiuttakkamik tunineqarpoq, nittartagaq Sermitsiaq.ag taama allaaserisaqarpoq.
Nersornaammik tamatuminnga tunineqarnera immikkut ittuuvoq, nalinginnaasumimmi erinarsuusiortumut danskisut erinarsortartumut tunniunneqartaraluarmat.
- Kalaaleqatikka tamaasa pilluaqqorusuppakka. Danmarkimimi ukiormanna erinarsuusiortutut nersornaasiuttakkap uannut kalaallisuinnaq erinarsortartumut tunniunneqarnera Nunatsinnut tamarmut nersornaataavoq, Rasmus Lyberth nittartakkamut taama oqarpoq.
Aamma atuaruk Rasmus Lyberth DMA Folkimi nersornaasigassatut innersuunneqartoq
Nipilersornerup iluani suliaqartut nersornaasigassanik toqqaasuunerat immikkut nuannaarutigaa.
- Suliakka pillugit nersorniarneqarnera nuannaarutigeqaara. Erinarsuusioqqinnissannut kajumissaataavoq aammalumi taamaaliussamaarpunga, Rasmus Lyberth Sermitsiaq.ag-mut taama oqarpoq.
Rasmus Lyberth saqqummersitani nersualaarneqarluartoq Alaatsinaassuseq Aquttoralugu pillugu nersorniarneqarpoq.
AAMMA ATUARUK Nunatta erinarsortartorsua - Rasmus Lyberth - inuuissiorpoq