VIDEO Rappertalerlaajaqqap saqqummeeqqaataa aalassatsitsisoq
Philip Knudsenip angajoqqaaminut tusaaqqulluni oqariartuutai sakkortuut paatsuugassaanngillat:
- Anaanaga ataatagalu ikiaroortarlutik pisarsimammata. Nuanniitsunik uannut iliuuseqartaramik. Taava qaangersinnaajunnaarnikuuara qanoq aqussanerlugu inuunera, 15-inik ukiullip Philip Knudsenip taama musikvideomi erinarsorpoq nangillunilu.
- Inuuneq naluara.
AAMMA ATUARUK Allannguerusuppunga
Rapperlunilu erinarsornera inuit naapittarfianni facebookimi atuisunut aalassatsitsingaatsiarpoq:
- Oqariartuutaa assut sakkortoq. Attortinnaq.
- Aa, nallin. Meerannguit pisuussuteqaratik taamak atugaqartitaasartut.
- Kaaar, oqaatsit annernaraluarlutik piviusuusartut amiilaarnat!! Meerannguaq pikkorik, saqqummernissaanullumi suliaqarsimasut torrak!! Torrallaavusi!!
Videomik siammarterisunit ilaatigut taama qisuariartoqarpoq.
Inuit naapittarfiini facebookimi NUIF-ip, Nuummi inuusuttut siuarsartut, quppernerani musikvideo marlunngorninngorluni unnuap-qeqqartoq saqqummersinneqarpoq. Tassa rappertartuaqqap 15-inik ukioqalerlun inuuissiulernerani.
Akunnerillu 14-init ingerlanerini 7500-riarlugu takuneqareerpoq, amerliartuinnarlutillu.
Video KNR-ip atorsinnaagaa NUIF'imit akuersissutigineqarpoq, qulaani takujuk.