ILISARITITSINEQ Randip akisussaaffik illartitsinermik akoorpaa

31-nik ukioqarpoq, qalipaatinilu nuannarinerpaasaa soorunami tungujortuuvoq, inuttaata oqarnerattuut. Ukiut arfinillit Danmarkimeereerluni nunatsinnut uterami malugisimavaa ukiut taakku ingerlanerini allanngortoqarsimanngitsoq.

- Sisimiut 2001-imiilli qimassimasimallugit Danmarkimiit uterama, maluginiarpara allanngortoqarsimanngitsoq. Soorlu suna tamarmi uninngasoq. Taassuma kingorna imminut oqarfigaanga, ineriartortitsinermut nunattalu pitsaanermut ingerlanissaanut uanga peqataaniarpunga, Rand Vestergaard Evaldsen KNR-mut oqarpoq.

Aamma atuaruk Randi siulittaasuussaaq

Andreas Uldumimit nersualaartinneq

Demokraatit inuusuttaani 2013-mi oktoberimi siulittaasunngorpoq, tassangaaniilli ingerlarsulerpoq.

naalakkersuisut siulittaasorisimasaat Aleqa Hammond aningaasanik atornerluisimasoq ukiarmi paasineqarmat, qinerseqqittariaqarsimavugut. Randi Vestergaard Evaldsen qineqqusaaqataagami, 108-nit qinerneqarpoq, Demokraatinilu inatsisartunut isertuni sisamani ilaalluni.

Piffissaq sivisunngitsoq qaangiummat siulittaasup tulliatut toqqagaavoq. Andreas Uldumimiillu nersualaarneqaqaaq.

- Soorunami nuannaajallappunga. Randi Vestergaard Evaldsen ulapinnikooqaaq. Politikkimik suliaqarnikooqaaq, taamaammat qinigaammat isumalluarlungalu nuannaarpunga, Andreas Uldum 2014-mi septemberimi  KNR-imut oqarpoq.

Partii toqqaruminartoq

Randi Vestergaard Evaldsen politikkimut soqutiginnittuaannarsimavoq, namminerli politikikkut suleqataarusunnini kingusinnerusukkut aatsaat takusinnaalerpaa.

Demokraatiunissanilu nalunngereersimavaa.

- Kiffaangissuseqarneq upperaara. Demokraatit toqqarpakka, anguniakkaminni pingaartitaat inuttut uannut aamma pingaartuumata, siuaakka aamma killilersuinermik mikisitserusuttuupput. Imminnut qanigisatillu pilersorsimavaat. Suliffissaqarniarlutik periarfissaqarniarlutillu nuuttarsimapput, tamannalu qujanartumik uagut aamma kingornussimavarput, qungujulluni oqarpoq.

Randi Vestergaard Evaldsenip kinguaatta siunissaata ajunngitsuunissaa angorusuppaa.

Aamma atuaruk Demokraatit sunniuteqaqataanissaannut inuusuttut aqqutissiuussissasut

Inuusuttuniit naalakkersuisunut ukiut marluk ingerlangeranni

Qinersisoqarnerit tamaasa qineqqusaartorpassuit qinigaanngitsut takusarpagut.

Randi Vestergaard Evaldsenili ingerlalluarsimaqaaq, ukiut marluk ingerlanerini partiip inuusuttaasa siulittaasuannit Demokraatinut siulittaasunngorpoq, inuussutissarsiornermullu, suliffeqarnermut niuernermullu naalakkersuisunngorluni.

- Naalakkersuisunngornera pisunit nuannerpallaanngitsunit pivoq, taamaakkaluartorli tatigineqarnera tulluusimaarutigaara. Akisussaasuseqarlunga sulissaanga, qilanaareqaara. Suna tamarmi sukkasuumik pisimavoq. Ilaannili tamanna pisariaqartarpoq, Randi Vestergaard Evaldsen oqarpoq.

Ingasattajaartunik quisaartartoq

Randi Vestergaard Evaldsen pikkunaanngilaq. Quiasaartuuvoq, ingasattajaartunik quiasaarsinnaasarluni, nammineq oqarnera naapertorlugu. Tamannalu Inatsisartuni allaffia iseraanni malunnarpoq.

Iseraanni maluginiakkar siulliit tassaapput Andreas Uldumip assii pingasut,”duckface”-rluni (qarlut kunissilertutut ingattarserluni isaallugit) assilisat. Naliginnaanngilaq partiit siulittaasuisa assii taamaattuusarneri.

- Quisaarnermik nuannarisaqarpunga. Ingasattajaartunik quiasaartarpunga, akissussaaffilli tiguara, politikeri 31-inik ukiulik oqarpoq.

Qarasaasiaaqqami oqarasuaammilu angallattakkami pinnguaatini nuannarinerpaasa tassaavoq Candy Crush. Pinnguaat mamakujuttunik assigiissaariniarnermik anguniagaqartoq. Taakkulu nassartuaannarpai.

- Anartarfimiikkaluaraangamaluunniit Candy Crushertarpunga, qungujulluni oqarpoq.

Amerlanertulli anaanami igaavi mamarinerpaasarai.

- Tuttumit osso buco mamaraara. Anaanamalu igassallugu kakkaffigalugu, Randi Vestergaard Evaldsen oqarpoq.

Aamma atuaruk Randi Vestergaard Evaldsen (D)

Suleqatini tutsuigaa – assammik arsaannermiunngitsorli

Ilinniartitaanermut naalakkersuisoq, Nivi Olsen, aamma Demokraatineerpoq, Randi Vestergaard Evaldsenilu suliffiup avataatigut aamma ilisarisimasaralugu. Naalakkersuisunngortup uppernassusaa pingaartippaa.

- Politikkeritut sullarissuuvoq. Sulinera tatiginartuuvoq. Aamma anguniangaqallaqqinnera, sumullu nunarput ingerlatissallugu nalorniginngilluinnarpaa.

Nivi Olsenip ilanngullugu oqaatigaa Randi Vestergaard Evaldsen politikeriusoq pikkorissoq, sukkasuumik aallussilluarlunilu sulisartoq, aammalu kammaalluuartuusoq.

- Siullermik inuk tatiginartuuvoq, ikinngutiminillu ajornartorsiortoqartillugu tamtingorluinnaq ikiuullunilu tapersersuisarpoq. Qiimasorujussuuvoq, illarsaarinikkaajuvoq, tassa nuannequtaa.

- Timersornermi ulorianartuuvoq, ajungaarusussusaa takujumagaani håndboldtimi taava forsvarertoq isinginnaarneqarsinnaavoq, Nivi Olsen qungujulluni oqarpoq.

Taamaattumik Nivi Olsenip Randi Vestergaard Evaldsen naalakkersuisooqatigissallugu tutsuigaa.

- Ataaserli nalorninanngittumik oqaatigisinnaavara, Randi naalakkersuisoqarfimmi issiatillugu, naalakkersuisoqarfik ernumananngilaq.