RAL kukkunernut utoqqatsertoq

Royal Arctic Line sapaatit akunnerata siuliani ajornartorsiunnginneruvoq. Umiarsuaatileqatigiiffiummi containerinik assartuinermut sapaatit akunnerani 27-mi suliaasa 6,1 procentii kukkuneqarput, sapaatillu akunnerata siuliani suliaasa 2,3 procentii kukkuneqarlutik.

Assartuinermi kukkunerpassuit ilaatigut Pilersuisumut Pisiffimmullu eqquipput. Pisinniarfiit ikinnerusunik nioqquteqartarsimapput, pisiniartullu pakatsisarsimallutik.

Royal Arctic Linellu kukkussutinut akisussaasuunini erseqqissarnerusariaqaraa, Pilersuisumit isumaqarput.

- Sinerissami niuertutsinnut ajornartorsiortitsivoq. Taakkumi pisiniartunut ulluinnarni attaveqartarput, nioqqutissanillu sooq amigaateqartarnitsinnut suna pissutaanersoq nassuiaanniarsarisarlugit. Niuertugut naammagittaalliorfigineqartarput. RAL-ip uagut kukkusuunnginnerput, kukkussutillu taakkunanngaanneersut pillugu nassuiaateqarnissaminik akisussaaffini naammassinissaanut naammattumik iliuuseqanngitsoq isumaqarpunga, KNI-p nioqqutissarsiniarnermut logistikkimullu pisortaa, Kurt Lauritsen oqarpoq.

AAMMA ATUARUK RAL-ip kukkuluttorneranik Pilersuisoq eqqugaaqqasoq

AAMMA ATUARUK RAL ajornartorsiormat Pisiffik nioqqutissanik eqqaasariaqartarsimavoq

Royal Arctic Linep pisortaa, Verner Hammeken, tamatumunnga akissuteqarluni KNR-imut mailikkut ima allappoq:

- Pilersuisup kukkunerit Royal Arctic Linemeersuusut pillugu naammattumik erseqqissaasorinngippatigut, taava soorunami ilumoorpoq. Tamannalu utoqqatsissutigissavarput, pisortaq allappoq.

Atortorissaarutinik nutaanik atuutilertitsineq kukkussutinut pissutaatinneqarpoq. Verner Hammekenilu KNR-imut ima allappoq:

- Nutaamik atortorissaaruteqarpugut, tassanilu nalunaarsuutit aallaqqaataaniit eqqortumik nutarternissaat unammillernarpoq. Taanna iluarsippat kukkunerit, tamanut eqquisut, sapaatit akunnerini arlaqanngitsuni ikilisorujussuussapput. Taamaattoqarnissaalu ukkataraarput, Hammeken allappoq.

Royal Arctic Linep misissuinera naapertorlugu, kukkussutit sapaatit akunneri marluk tallimalluunniit ingerlanerini aaqqiivigineqassasut, pisortaq allappoq.

AAMMA ATUARUK RAL-imi inniminniinermi sullississut nutaaq Brugsenimut ajornartorsiutaasoq

AAMMA ATUARUK RAL-ip assartuinini ajornartorsiutigigaa