RAL: Nalunngilarput Aalborgip umiarsualivianut tusarluarnerunngitsoq
Royal Arctic Linelli pisortaanera, Verner Hammeken, naapertorlugu Aalborgimi umiarsualivik oqaloqatiginiarneqarsimagaluarpoq.
- Taama nalunaaruteqarnitsigut Aalborgimi umiarsualivik oqaaseqartissinnaalissallugu neriuutigaarput, RAL-ip pisortaanera Verner Hammeken KNR-imut oqarpoq.
Aamma atuaruk RAL: Nunarsuarmi umiarsualiviit uagutsinnut ammapput
Aalborgimi umiarsualivik 2019-imiit aallaaviujunnaassasoq neriuutigigitsik, taassuma oqaatigaa, Aalborgillu umiarsualiviani sulisut 110-t missaanniittut pilersaarummik matuminnga sapaatip akunnera una nalunaarfigineqarsimanerat oqaatigalugu.
- Assartuussinermik nutaamik aaqqissuussigutta nunatsinnut iluaqutaassasoq innimisuutigalugulu ataqqivarput, tamannalu Aalborgimi sulisunut tusarluarnartuunngilaq, aammalumi Aalborgimi suleqatitsinnut iluaqutaasussamik soorunami aaqqisuutissarsiussaagut, Verner Hammeken oqarpoq.
Royal Arctic Line Aalborgimi umiarsualivik aallaavittut talittarfigissallugu 2022-p tungaanut isuamaqatigiissuteqarpoq, tamatumalu atuutiinnarnissaa, Aalborgip umiarsualiviata piumasaralugu tusagassiuutinut nalunaaruteqarluni allaaserisaqarpoq.
- Pilersaarutigisagut ammasumik oqaatigaagut neriulluta Aalborgip umiarsualivialu Kalaallit Nunaannut suna iluaqutaanerpaassanersoq oqaloqatigiissutigisinnaagipput, RAL-ip pisortaanera oqarpoq.
Aamma atuaruk Illoqarfiup siulersortaa: RAL-ip Aalborgimut umiartorneq unitsippaa
Imaanngilarli nunatsinnut iluaqutaanerpaasussaq Aalborgip umiarsualivianut aamma iluaqutaassasoq.
- Pilersaarutaat kinguneqassaqaaq. Isumaqatigiissut 2010-mi sivitsoratsiguli ilatigut quersuanut containerileriffimmullu koruninik hundred millioninit amerlanernik aningaasaliivugut, taava aningaasaliissutitsinnut taarsersuinissarput naapertuutinngitsumik ukiunik pingasut sisamanik sivikilleriataarpoq. Tamannalu nipangiinnarluta akuersaarsinaanngilarput, Aalborgip borgmesteria amma Aalborgip umiarsualiviani siulersuisunut siulittaasuusoq, Thomas Kastrup-Larsen, oqarpoq.
Kisianni tassa Aallborgip umiarsualivia Royal Arctic Linesip siunissami pilersaarutaanut ilanngilaq.
- Peqateqarluta pilersaaruteqarpugut, pilersaarutillu ilaa piviusunngortittariaqarpagut. Naak 2019-imi juunimut sanilliullugu ullunik allanik toqqagassaqaraluartoq - soorlu assersuutigaluug 2022-ip naanera immaqaluunniit taakkua akonranni - nalunanngilluinnarpoq, uagut peqatigullu pilersaarusiarput malerusunngipilussuuarput, Verner Hammeken oqarpoq.
Pisortaaneq naapertorlugu Royal Arctic Linep Aalborgillu umiarsualiviata siulersuisooqatigii sapaatit akunnerit sisamat iluanni aaqqiissutaasinnaasumik ujartuiniarlutik ataatsimiissapput.
Aamma atuaruk RAL suleqatitaarpoq
