ASSIT RAL-ip umiarsuartaassaasa tallimaasut ilaat ataaseq Polenimi singinneqarpoq
Umiarsualiassat katillugit 750 millionit koruuninik naleqartut arlalinnik aporfeqarluni ukiuni arfineq-marlunni naammassiniarneqarput. Assersuutigalugu umiarsualiorfiit suliakkerneqartut marluk akiliisinnaajunnaarput aammalu sisak igalaaminerlu immikkuullarissoq atorneqarlutik.
Polenimi Umiarsualiorfik Remontowa umiarsuarmik issittup issinnersuanut akiuussinnaasumik ilusilikkamik umiarsualiaminik singitsikkajunngilaq.
Ullumili taamaaliorpoq.
Taamalu pineq Royal Arctic Linep pisortaaneranut Jens Andersenimut nuannaarutaalluinnarpoq.
Ajornaatsuinnaasimanngilaq
Tassami naak 750 millionit koruuninik aningaasaateqaraluaraanniluunniit umiarsualiortussarsiorneq ajornaatsuinnaasimanngilaq.
- Umiarsuit isikkui assigiinngitsut pingasuummata - umiarsuit allanik asseqanngillat, isikkut pingasut tamarmik immikkuullarissuupput - umiarsualiorfiit imannarsuaq soqutiginninneq-ajorput. Umiarsualiorfimmullu saaffiginnikkaanni ima akikkajupput: Umiarsuarmik assigiiaat normuannik uannga pisinnaavutit. Uagulli ima oqarpugut: Ima imalu piumasaqaatitalinnik piumasaqarpugut. Qanoq akiliissaagut?
Umiarsualiassallumi suliarinnikkumasinnaasut pingasut aqqusaaqqaarlugit aatsaat aallartinneqarput. Tassami Royal Arctic Linep suliakkiutaa naammassineqanngitsoq suli Tysklandimi umiarsualiorfiit marluk akiliisinnaajunnaarput.
Pingajussaani aatsaat iluatsilersoq
- Pingajussaani iluatsinniarpasilerpoq. Umiarsuimmi ukua naammassillugit tunniutissagaat qularutiginngilara, Jens Andersen oqarpoq.
2008-mi umiarsuit marluk suliakkiutaapput. Kingornatigut tallimanut amerlipput.
Umiarsualiorfimmut Remontowamut taakkunannga tallimanik, Nunatsinni assartuussinermi atugaareersunut taartaasussanik, umiarsualiorneq suliaavoq immikkuullarissoq. Umiarsualiorfiup tuniniaanermi pisortaa, Jan Pasjowski, taama oqaluttuarpoq:
- Umiarsuit 35-nik issittartumut sanaajupput, tassalu umiarsuit nalinginnaasuliaanngillat. Taamaammat sisak immikkuullarissoq taamaallaat umiarsuarnut taamaattunut atorparput. Umiarsuit pingasut nutaarluinnarmik ilusilersorlugit aallaqqaaterpiaanit sanaqqaartariaqarsimavagut, umiarsuillu tallimat issittumi atugassatut sanaartugaapput, umiarsuillu ukua taama angissusilinni nunarsuarmi siullerpaajupput. Ataatsimullu isigalugu taamaattunik umiarsualiorneq pisariusupilussuuvoq.
