Assi: Destination Arctic Circle/Flickr Creative Commons

RAL-ip umiarsuaataanik sanaartorfiusarsimasumi pinngitsaaliisaallutik sulisartunik sulisoqarsimasoq

Polenimi umiarsualiorfimmi Remontowami Royal Arctic Linep umiarsuaataanik sanaartorfiusarsimasumi polenimi paarlattaasartussarsiuussisarfik aqqutigalugu korea avannarlermiunik pinngitsaalisaallutik sulisartunik sulisoqartarsimavoq. Danskit aviisiat Information taama allappoq.

Tamanna Royal Arctic Linep pisortaata uissuummissutigaa, KNR-imullu oqarluni ilisimanagu korea avannarlermiut umiarsuaatiminnik sanaartoqataasimanersut. Ingerlatseqatigiiffiup suliaq maanna misissuiffiginialerpaa.

Illersornissaqarfiup umiarsuaataata nakkutilliissutip nutaap Lauge Kochip korea avannarlermiut pinngitsaalisaallutik sulisartut suleqataaffigisimammassuk, sapaatit akunnerisa kingulliit ingerlaneranni Informationip Danmarks Radiollu sammisimavaat.  DR2'p piviusulersaarutaani "Krigsskibets Hemmelighed"imi polenimi umiarsualiorfimmi korea avannarlermiunik pinngitsaalisaallutik sulisartunik inussiaateqarnermut assigusumik sulisoqartarsimavoq.

Taassuma saniatigut umiarsualiorfik pasillerneqarpoq korea avannarlermiut akissarsiaasa ilarujussuinik Korea Avannarlermi kisermaassillutik naalakkersuisunut nassiussuisartutut.

Immikkut ilisimasallit isumaqarput aningaasat Korea Avannarliup atomip nukinganik pilersaarututaanut atorneqartartut.

Information naapertorlugu polenimiut umiarsualiorfiata Remontowap umiarsualiorfittut allatut paarlattaasartussarsiuussisarfik Armex atortarsimavaa. Ukiut 00-it atuuffianni aamma 2015-imiit maannamut atortarsimallugit.

Armexip korea avannarlermiunik sulisitsisarnini tusaamasaanerluutigaa. Information naapertorlugu polenimi sullivinnik nakkutilliiviup paasissutissaataani takuneqarsinnaavoq ukiuni kingullerni Armexip sulisartut atortarsimasai tamarmik korea avannarlermeersuusut.

Piffissami tassanerpiaq Roayal Arctic Linep umiarsuit Mary, Ivalo, Minik aamma Malik Arctica Remontowami sanatissimavai.

- Nutaarsiassat tamakku assorsuaq uissuummissutigaavut allatullu oqarsinnaanata ilisimasaqarfiginnginnatsigu umiarsuaateqarfiup umiarsuaataasa sananerinut sulisartut korea avannarlermeersut sulisorineqarsimaneri ilisimannginnatsigu, Roayal Arctic Linemi pisortaaneq Verner Hammeken KNR-imut oqarpoq.

Umiarsuaatileqatigiiffiup umiarsuliorfik attaveqarfigisimavaa paasiniarlugu paarlattaasartussarsiuussisarfimmeersut Armeximi umiarsuaatiminnik sanaqataasimanersut nunanilu suminngaanneersut sanaqataasimanersut paasiniarlugu.

KNR-ip Remontowa aamma attaveqarfigisimavaa, umiarsualiorfiulli KNR-ip saaffiginnissutaa akissuteqarfigisimanngilaa.

Verner Hammekenip ilanngullugu oqaatigaa Roayal Arctic Linemi sumiuugaluanilluunniit pinngitsaaliillluni sulisitsineq akerlerilluinnaramikku, maannakkullu polenimi umiarsualiorfik attaveqarfiginnginnamikku.

Korea avannarlermiunik ilumut pinngitsaaliilluni Roayal Arctic Linep umiarsuaataanik sanaqataasoqarsimanersoq sanaqataasoqarsimannginnersorluunniit maannakkorpiaq uppernarsineqarsinnaanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!