RAL-ip millionerpassuarnik sipaarutini saqqummiukkai

Royal Arctic Linep ingerlatsinini siornamut naleqqiullugu akikinnerulersissimavaa.
Assi © : Jacob Strøm/RAL
septembarip 20-at 2016 12:06
Nutserisoq Simon Uldum -

Ingerlatsinikkut 38 millionit koruuninik sipaaruteqarpoq. Ingerlatseqatigiiffiup 2016-imi ukiup affaanut siullermut naatsorsuutaani tamanna takuneqarsinnaavoq.

Uuliamut akigitinneqartut appasinneruneri ilaatigut pissutigalugit suliffeqarfissuup aningaasartuutai ikinnerulerput, tamatumunngalu peqatigitillugu assartuussineq sullitanut akikinnerulersimalluni.

Aamma suliffeqarfissuup suliffeqarfiutiminik pingasunik tunisaqarsimanera, aamma pisortaqatigiinni allaffissornermilu allannguinerit pissutigalugit aningaasartuutikillisimavoq.

Angusalli tamaasa sipaaruteqarnermeersuunngillat. Assartukkammi amerlinerat aamma iluanaaruteqarnerunermik kinguneqarput.

Umiarsuaatileqatigiiffik naapertorlugu, inuiaqatigiinni aningaasarsiornikkut kaaviiaartitsisoqarneruneranut tamanna takutitsivoq, tamannalu pitsaasutut oqaatigisariaqarpoq.

Ilaatigullu nunatta avammut nioqquteqarnerata siorna piffissap taamaalineranut naleqqiullugu 22 procentinik qaffariaateqarsimanera umiarsuaatileqatigiiffiup nuannaarutigaa.

Assartugassallu amerlaneruleraluartut uulialu akikinneruleraluartoq, taamaattumillu RAL-ip ingerlanneqarnera akikinnerulerluni, umiarsuarnik nutaanik tallimanik sanaartortitsineq umiarsuaatileqatigiiffimmut imaannaanngitsuusimavoq, sulilu taamaalluni.

Umiarsualiortitsinerup kinguaattooqqaneranut RAL aaqqiissutissarsiorpoq, maannamullu tamanna umiarsuit sanaartortani marluk pisiariniarunnaaginnarsimallugit.

Umiarsuarnik nutaanik sanaartortitsinermut ataasiartumik aningaasartuuteqartussaagaluarluni, ingerlatseqatigiiffiup naatsorsuutigaa ukioq tamanna angusat 2015-imi angusat assigissagaat, tamannalu ingerlatsinikkut aamma pitsanngoriaataassaaq, RAL taama allaaserisaqarpoq.