RAL-imi sulisut ullut pingajussaanik suliumajunnaaqqasut

RAL-ip Aalborgimi immikkoortortaqarfiani 3F-ip isumaqatigiissutaata ataani sulisut sinniisuat, Michael Gregersen, KNR-imut taama ilisimatitsivoq.

RAL-ip 2022-p kingorna Aarhusimiittussanngorneranik tusagassiuutitigut tusartinneqarsimanertik sulisut pakatsissutigeqqavaat.

- Suliluunniit nalunaarfigineqarata suliffitta inissisimanera pillugu tusagassiuutitigut tusartinneqarpugut. Tamannalu siornatigut uparuarneqareersimammat taamatut pisoqaqqinnissaa ilimagisimanngikkaluarparput. Taamatulli pisoqarpoq.

- Naleqqutinngilaq. Danmarkimi sulisorisanut ataqqinninnginneruvoq, tamannalu Kalaallit Nunaanni pisortarisatta eqqarsaatigisariarpaat.

AAMMA ATUARUK RAL-ip Aalborgimi sulisuisa suliumajunnaarnertik attatiinnaraat

Sulisut sinniisaat suliatigut peqatigiiffimmit HK og Metalimeersut peqatigalugit, Michael Gregersenip RAL-ip pisortaanera, Verner Hammeken, Aalborgimi ippassaq ataatsimeeqatigaa.

Verner Hammeken ataatsimiinnermi tassani nassuiaavoq RAL-ip kingusinnerpaamik 2022-mi Aalborgimiikkunnaarnissaa pillugu, sulisunik ilisimatitseqqaarani tamanut ammasumik nalunaaruteqarnissaq pisariaqarsimasoq, Aalborg Havnip isumaqatigiinniaqatiginissaa siunertaralugu.

AAMMA ATUARUK Aalborg Havnip RAL pakatsissutigigaa

Taamatulli nassuiaateqaraluartoq sulisut ullumikkut tallimanngornermi suliartoqqinngillat.

Michael Gregersenilli suliumajunnaarnerup sapaatit-akunnerata tulliani aamma ingerlateqqinneqarnissaa neriuutiginnginnerarpaa.

- Suliumajunnaarnerup ingerlateqqinneqarnissaa tulluarsorinngilara, tamannami kikkunnulluunniit iluaqutaanavianngilaq. Ajornartorsiutinimmi pilersitsivoq, ingerlateqqinneqassanersorli oqaatigisinnaanngilara, sulisut sinniisuat taama oqarpoq.

AAMMA ATUARUK RALimi sulisut pakatsipput