RAL allamiunik inuttaqarluni angalasalerusuttoq

Royal Arctic Linep umiarsuaatimini maanna inuttani allamiunik taasersoratarsinnaavai.

Pisortaaneq Verner Hammeken nittartakkamut Shipping Watchimut taama ilisimatitsivoq. Aamma Royal Arctic Line danskit erfalasuat atorlugu siunissami imaassinnaavoq angalajunnaartoq.

Tamanna islandimiut umiarsuaatileqatigiiffiannik Eimskipimik, Royal Arctic Linep umiarsuarnik nutaanik pingasunik pisiortoqatissaanik, suleqateqalernermik pissuteqarpoq.

Umiarsuit nutaat Nuka Arctica aamma Naja Arctica taarsissavaat, taamaaliortoqarneranilu inuttat taarserneqassapput, Verner Hammeken taama oqarpoq.

- Nuka Arcticami Naja Arcticamilu inuttat umiarsuit nutaat atulerpata taarserneqarnissartik soorunami naatsorsuutigissavaat.

Inuttallu taakku umiarsuarni Nunatsinni sinersortuni suliffissarsisinnaassajunnarsipput, Hammeken taama isumaqarpoq.

- Kalaallit Nunaanni pajuttuinermik nunaqarfinnillu sullissinermik nutarterineq ingerlavoq, taamaammat taakkunani suliffissarsisoqarnissaanut periarfissat pitsaassasut isumaqarpunga. Ingerlaarfinnimi taakkunani sulisut immaqa imarpik ikaarlugu angalanermit tamanna kajungerinerussavaat, pisortaaneq oqarpoq.

Danskit kattuffianni, Søfartens Ledere, pisortap Fritz Ganzhornip taama ineriartortoqarnera ernumanartoqartippaa.

- Umiarsuaatileqatigiiffiup Atlantikumi angallassinermi qanoq pisoqarnissaanik nalunaarutai tunngaviatigut ernumanartoqartippagut, angallassinerummi 2/3-delia Eimskipimit ingerlanneqartussaassammat. Umiarsuaatileqatigiiffik allamiunik akissarsiakitsunik atuisarnerminik ilisimaneqartoq.