RAL 400 millioner koruuninik utertuussaaq
Royal Arctic Line-ip umiarsuit nutaat tallimat pillugit tyskit umiarsualiorfiannik P & S Werftenimik isumaqatigiissusiani atorunnaarsippai, RAL-illu sulisuisa Tysklandimi Stralsund qimappaat.
Royal Arctic Line-ip taama nalunaaruteqarnera, Attaveqarnermut naalakkersuisup Jens B. Frederiksenip uggoraa, erseqqissaatigalugulu aningaasanik tamanna annaasaqaataanngitsoq.
- Soorunami uggornartorujussuuvoq, kisianni uani eqqaamaneqassaaq avataaniit pisut matumani pissutaammata. Taamaammat pisut allanngortissinnaanngilavut. Kisianni nalunngilara Royal Arctic Linep umiarsualiorfimmi allami suliarinnittoqarsinnaanera massakkut periarfissarsiorfigigaa. Tamanna iluatsikkumaartoq qularnarpallaanngilaq, taava uanga Naalakkersuisunut paasissutissiissummik qanittukkut suliaqarumaarpunga, Attaveqarnermut Angallannermullu Naalakkersuisoq Jens B. Frederiksen oqarpoq.
Tysklandimi umiarsualiorfiup P & S Werftenip akiliisinnaajunnaarneratigut umiarsuit tallimat nutaat sanatinnissaat pillugu isumaqatigiissut atorunnaarsinneqarpoq, aningaasallu siumut akiliutigineqareersut 400 millioner koruunit aningaaserivinni qularnaveeqqusiussat utertinneqarnissaat piumasarineqarpoq.
- Qaqutigoortuuvoq millionit untritillit arlallit kontomut ikineqarnissaata ajuusaarutigineqartarnera, kisianni pisoq uagutsinnut maannakkut taamaappoq. Umiarsualiorfiup ajutoorujussuarnera misigisaavoq pakatsinartoq, kisianni uagut piaartumik paasinarsisoqarnissaanik neriuuteqarpugut aamma umiarsuarnik nutaanik inniminniisinnaanissamut isumaqatigiissusiorsinnaaneq eqqarsaatigalugu, Royal Arctic Line-ip pisortaanera Jens Andersen, tusagassiuutinut nalunaarummi ilaatigut allappoq.
Qularnaveeqqutit akilerneqareerpata umiarsualiorfimmik nutaamik toqqaanissaq aallartissinnaassasoq Royal Artic Line-imit oqaatigineqarpoq, umiarsuarnillu nutaanik maanna pisaartoqarsinnaanngikkallarnera illoqarfinnut nunaqarfinnullu assartuinermut sunniuteqangaarnavianngitsoq, Jens B. Frederiksenip oqaatigaa.
- Annertuumik sunniuteqarnavianngitsoq Royal Arctic Linemiit paasitinneqarnikuuvunga. Umiarsuit maanna atorneqartut atorneqarnerat soorunami sivitsorneqartariaqarpoq, kisianni tamanna annertuumik sunniuteqartussaanngilaq, Ineqarnermut, Attaveqarnermut Angallannermullu naalakkersuisoq, Jens B. Frederiksen oqarpoq.
